മാഡ്രിഡ്
യുവേഫ നേഷൻസ് ലീഗിൽ സ്‌പെയിൻ പോർച്ചുഗൽ മത്സരം സമനിലയിൽ. തുല്യശക്തികൾ ഏറ്റുമുട്ടിയ മത്സരത്തിൽ 1-1 എന്ന സ്‌കോറിനായിരുന്നു മത്സരം അവസാനിച്ചത്. പന്ത് കൈവശം വക്കുന്നതിലും അവസരങ്ങൾ സൃഷ്ടിക്കുന്നതിലും സ്‌പെയിനിനായിരുന്നു മുൻതൂക്കം.

മത്സരത്തിൽ 25ാം മിനുട്ടിൽ അൽവാരോ മൊറാട്ടയിലൂടെ സ്‌പെയിൻ ആദ്യഗോൾ കണ്ടെത്തി. മികച്ച പ്രത്യാക്രമണത്തിൽ പാബ്ലോ സറാബിയയുടെ പാസിൽ നിന്നായിരുന്നു മൊറാട്ടയുടെ ഗോൾ. 11 ഷോട്ടുകളാണ് സ്‌പെയിൻ എതിർ പോസ്റ്റിലേക്ക് പായിച്ചത്. അതിൽ രണ്ടെണ്ണം ഷോട്ട് ഓൺ ടാർഗറ്റാവുകയും ചെയ്തു.
അതേസമയം ഏഴ് ഷോട്ട് മാത്രമേ പോർച്ചുഗീസ് താരങ്ങൾ എതിർ പോസ്റ്റിലേക്ക് പായിച്ചുള്ളു. ഇതിൽ രണ്ടെണ്ണം ഷോട്ട് ഓൺ ടാർഗറ്റാവുകയും ചെയ്തിട്ടുണ്ട്.
ആറിന് പോർച്ചുഗൽ സ്വിറ്റ്‌സർലൻഡിനെ നേരിടുമ്പോൾ സ്‌പെയിൻ ചെക്ക് റിപ്പബ്ലിക്കുമായി കൊമ്പുകോർക്കും.
മറ്റൊരു മത്സരത്തിൽ 2-2 എന്ന സ്‌കോറിന് ഇസ്രയേൽ ഐസ്ലൻഡിനെ സമനിലയിൽ തളച്ചു. എതിരില്ലാത്ത ഒരു ഗോളിന് നോർവെ സെർബിയയേയും പരാജയപ്പെടുത്തി.