ന്യൂഡല്‍ഹി: രാഹുല്‍ ഗാന്ധി ഡല്‍ഹിയിലെ ഔദ്യോഗിക വസതി ഒഴിയുന്നു. തുഗ്ലക് ലൈനിലെ വസതിയില്‍ നിന്ന് സാധനങ്ങള്‍ മാറ്റിത്തുടങ്ങി. ഒരു ലോറി നിറയെ വീട്ടുസാധനങ്ങളാണ് മാറ്റിയത്. 19 വര്‍ഷത്തിന് ശേഷമാണ് രാഹുല്‍ ഈ വസതി ഒഴിയുന്നത്. ലോക്‌സഭയില്‍ നിന്ന് ആയോഗ്യനാക്കിയതിന് പിന്നാലെ ഔദ്യോഗിക വസതി ഒഴിയണമെന്ന് ആവശ്യപ്പെട്ട് കേന്ദ്ര സര്‍ക്കാര്‍ രാഹുലിന് നോട്ടീസ് നല്‍കിയിരുന്നു. ഔദ്യോഗിക വസതിയില്‍ നിന്ന് മാറണമെന്നാവശ്യപ്പെട്ട് ലോക്‌സഭാ സെക്രട്ടറിയേറ്റാണ് രാഹുലിന് നോട്ടീസ് നല്‍കിയിരുന്നത്. മെയ് 22നകം ഔദ്യോഗിക വസതി ഒഴിയണമെന്നായിരുന്നു നോട്ടീസ്.

#WATCH | Trucks from Congress leader Rahul Gandhi's 12 Tughlak Lane bungalow leave for his mother and UPA chairperson, MP Sonia Gandhi's residence at 10 Janpath.

He is vacating his residence after being disqualified as Lok Sabha MP. pic.twitter.com/t4gANaLaRm

— ANI (@ANI) April 14, 2023

എന്നാല്‍ ഇതിനു മുമ്പു തന്നെ താന്‍ ഈ വസതിയില്‍ നിന്നൊഴിയുമെന്ന് വ്യക്തമാക്കി രാഹുല്‍ ഗാന്ധി ലോക്‌സഭാ സെക്രട്ടറിയേറ്റിന് കത്ത് നല്‍കിയിരുന്നു. അപ്പീലില്‍ സൂറത്ത് സെഷന്‍സ് കോടതി വിധി ഈ മാസം 20ന് വരാനിരിക്കെയാണ് രാഹുല്‍ ഗാന്ധിയുടെ വസതി മാറ്റം. ഈ വിധി വരെ കാത്തിരിക്കാതെയാണ് രാഹുല്‍ ഗാന്ധി ഔദ്യോഗിക വസതിയൊഴിയുന്നത്. ഏറെ നിര്‍ണായക രാഷ്ട്രീയ ചര്‍ച്ചകള്‍ക്ക് വേദിയായ വസതിയാണിത്. 2004ല്‍ യു.പിയിലെ അമേത്തിയില്‍ നന്ന് ജയിച്ചപ്പോഴാണ് രാഹുല്‍ ഗാന്ധിക്ക് ഈ വസതി ലഭിക്കുന്നത്.

നിരവധി കോണ്‍ഗ്രസ് അനുഭാവികളാണ് രാഹുലിന് സ്വന്തം വീട് നല്‍കുമെന്ന് പ്രഖ്യാപിച്ച് രംഗത്തെത്തിയത്. പിന്നാലെ എന്റെ വീട് രാഹുലിന് എന്ന പേരില്‍ കോണ്‍ഗ്രസ് ഒരു പ്രചാരണപരിപാടി ആരംഭിക്കുകയും ചെയ്തു.