പാംപ്ലോന: അര്‍ജന്റീനയ്ക്ക് സൗഹൃദ മത്സരത്തില്‍ തകര്‍പ്പന്‍ ജയം. അര്‍ജന്റീന എതിരില്ലാത്ത അഞ്ച് ഗോളിന് എസ്റ്റോണിയയെ തോല്‍പിച്ചു. ക്യാപ്റ്റന്‍ ലിയോണല്‍ മെസിയാണ് അഞ്ച് ഗോളും നേടിയത്. 7, 45, 47, 71, 76 മിനുട്ടുകളിലായിരുന്നു മെസിയുടെ ഗോളുകള്‍. കരിയറിലെ 56-ാം ഹാട്രിക്കാണ് എസ്റ്റോണിയ്‌ക്കെതിരെ മെസി നേടിയത്.

ജയത്തോടെ തോല്‍വി അറിയാതെ 33 മത്സരങ്ങള്‍ പൂര്‍ത്തിയാക്കാനും മെസിക്ക് കഴിഞ്ഞു. യൂറോ കപ്പ് ജേതാക്കളായ ഇറ്റലിക്കെതിരെ ഫിനിലിസമ കിരീടം നേടിയ ടീമില്‍ എട്ട് മാറ്റം വരുത്തിയാണ് അര്‍ജന്റീന ഇറങ്ങിയത്. മെസി, റോഡ്രിഗോ ഡി പോള്‍, നഹ്വല്‍ മൊളീന എന്നിവര്‍ ഒഴികെയുള്ളവര്‍ക്കെല്ലാം കോച്ച് ലിയണല്‍ സ്‌കലോണി വിശ്രമം നല്‍കി. ബ്രസീലിനെതിരായാണ് അര്‍ജന്റീനയുടെ അടുത്ത സന്നാഹമത്സരം.