ആപ്പിള്‍ ഐഫോണ്‍ 15 സീരീസ് ഈ വര്‍ഷം സെപ്തംബറില്‍ പുറത്തിറങ്ങുമെന്നാണ് പ്രതീക്ഷിക്കുന്നത്. ഐഫോണ്‍ 15 വിപണിയിലെത്തുന്നതോടെ ആപ്പിള്‍ പഴയ ഐഫോണുകളില്‍ ചിലത് വിപണിയില്‍ നിന്ന് എന്നന്നേക്കുമായി നിര്‍ത്തലാക്കാന്‍ സാധ്യതയുണ്ട്. മുന്‍ വര്‍ഷങ്ങളിലെ പോലെ ഈ വര്‍ഷവും പുതിയ ഫോണുകള്‍ക്കായി കമ്പനി പഴയ മോഡലുകള്‍ ഉപേക്ഷിക്കുമെന്നാണ് റിപ്പോര്‍ട്ടുകള്‍ പറയുന്നത്.

ഐഫോണ്‍ 15 സീരീസ് ലോഞ്ച് ചെയ്തതിന് ശേഷം ഐഫോണ്‍ 14 പ്രോ, ഐഫോണ്‍ 14 പ്രോ മാക്‌സ്, ഐഫോണ്‍ 13 മിനി, ഐഫോണ്‍ 12 തുടങ്ങിയ മോഡലുകളാണ് നിര്‍ത്തലാക്കാന്‍ സാധ്യതയെന്ന് ടോംസ് ഗൈഡ് റിപ്പോര്‍ട്ട് ചെയ്തു. അതേസമയം, ഐഫോണ്‍ 14 നിലനിര്‍ത്താനാണ് സാധ്യത. എന്നാല്‍ അതിന്റെ വില കുറയാന്‍ സാധ്യതയുണ്ട്.

ഐഫോണ്‍ 15 സീരീസിന് കീഴില്‍ ആപ്പിള്‍ നാല് മോഡലുകളാണ് അവതരിപ്പിക്കാനിരിക്കുന്നതെന്നാണ് റിപ്പോര്‍ട്ട്. അടിസ്ഥാന ഐഫോണ്‍ 15 വേരിയന്റ്, ഐഫോണ്‍ 15 പ്ലസ്, രണ്ട് പ്രോ മോഡലുകള്‍ ഐഫോണ്‍ 15 പ്രോ, ഐഫോണ്‍ 15 പ്രോ മാക്‌സ്. ആദ്യത്തെ രണ്ടു മോഡലുകളില്‍ എ 16 ബയോണിക് ചിപ് സെറ്റാണ് നല്‍കുന്നത്.