ആലുവ: ലഹരി വസ്തുക്കള്‍ വില്‍ക്കുന്ന സ്ത്രീ പിങ്ക് പൊലിസിനെ ആക്രമിച്ചു. ലഹരിവസ്തു ശിശുഭവനിലെ കുട്ടികള്‍ക്ക് വിതരണം ചെയ്യുന്നത് തടയുന്നതിനിടെയാണ് അപ്രതീക്ഷിത ആക്രമണമുണ്ടായത്. ആക്രമണത്തിന് ശേഷം രക്ഷപ്പെടാന്‍ ശ്രമിച്ച കൊല്‍ക്കത്തയില്‍ നിന്നുള്ള സീമയെ പൊലീസ് അറസ്റ്റ് ചെയ്തു.

സിവില്‍ പൊലിസ് ഓഫീസര്‍മാരായ പി.എം നിഷ, സ്‌നേഹലത എന്നിവര്‍ക്ക് നേരെയായിരുന്നു ആക്രമണം. നിഷയുടെ കൈക്കും കാലിനും പരുക്കേറ്റു. ആലുവയില്‍ സ്ഥിതി ചെയ്യുന്ന അനാഥമന്ദിരം കഴിഞ്ഞ കുറച്ചു ദിവസങ്ങളായി പൊലിസിന്റെ നിരീക്ഷണത്തിലായിരുന്നു. ഇവിടുത്തെ കുട്ടികള്‍ക്ക് ലഹരി മരുന്നുകള്‍ എത്തിച്ച് നല്‍കുന്നതായി പൊലീസിന് രഹസ്യ വിവരം ലഭിച്ചതിന്റെ അടിസ്ഥാനത്തിലാണ് പിങ്ക് പൊലീസിന്റെ നിരീക്ഷണം കര്‍ശനമാക്കിയിരുന്നത്.