ന്യൂഡല്‍ഹി: വിവാദ പരാമര്‍ശങ്ങളുടെയും തുറന്ന ഹിന്ദുത്വ സമീപനങ്ങളുടെയും പേരില്‍ വാര്‍ത്തകളില്‍ നിറഞ്ഞു നില്‍ക്കുന്ന ബോളിവുഡ് താരമാണ് കങ്കണ റണാവത്ത്. എന്നാല്‍ ഇത്തവണ പറ്റിയ അമളിയുടെ പേരിലാണ് നടി വാര്‍ത്തകളില്‍ നിറയുന്നത്. ഇനി അമളി എന്തെന്നല്ലേ.

ഖത്തര്‍ എയര്‍വേസ് സി.ഇ.ഒ അക്ബര്‍ അല്‍ ബേക്കറിന്റെ പാരഡി വിഡിയോ കണ്ടു കൊങ്കണ. പിന്നെ സംഭവിച്ചതോ. കങ്കണയിലെ പ്രതികരണ വീര്യം ഉണര്‍ന്നു. വീഡിയോ യഥാര്‍ത്ഥമെന്ന് കരുതിയ നടി എയര്‍വേസ് സി.ഇ.ഒയെ വിഢിയെന്നു വരെ വിളിച്ചു കളഞ്ഞു. ഇന്‍സ്റ്റഗ്രാം വീഡിയോയില്‍ സി.ഇ.ഒയെ തെറിവിളിച്ച് ഞെളിഞ്ഞിരിക്കുമ്പോഴാണ് കട്ടപ്പാരയുമായി നെറ്റിസണ്‍സ് രംഗത്തെത്തിയത്.കങ്കണ പങ്കുവെച്ച വീഡിയോ വ്യാജമെന്ന് തെളിയിച്ചു കളഞ്ഞു നെറ്റിസണ്‍സ്.

പ്രവാചകനായ മുഹമ്മദ് നബിയെ അപകീര്‍ത്തിപ്പെടുത്തുന്ന പരാമര്‍ശം നടത്തിയ നൂപൂര്‍ശര്‍മ്മക്ക് പൂര്‍ണ പിന്തുണ നല്‍കിയ താരം വികാരക്ഷോഭത്തില്‍ വിഡിയോ യഥാര്‍ഥമാണോ വ്യാജമാണോയെന്ന് അന്വേഷിക്കാന്‍ ശ്രമിക്കാത്തതിനെ നെറ്റിസണ്‍സ് പരിഹസിച്ചു. താരം സ്റ്റോറി സമൂഹമാധ്യമങ്ങളില്‍ നിന്ന് നീക്കം ചെയ്‌തെങ്കിലും അതിനിടയില്‍ തന്നെ സ്‌ക്രീന്‍ ഷോട്ടുകള്‍ പ്രചരിച്ചിരുന്നു.

കഴിഞ്ഞദിവസം ഖത്തര്‍ എയര്‍വേയ്‌സ് ബഹിഷ്‌കരിക്കണമെന്ന് ആഹ്വാനം ചെയ്ത് വാസുദേവ് എന്നയാള്‍ ട്വിറ്ററില്‍ വിഡിയോ പങ്കുവെച്ചിരുന്നു. ഇതിന് പാരഡിയായി മറ്റൊരു ഉപയോക്താവ് നിര്‍മ്മിച്ച വിഡിയോയാണ് താരത്തെ വെട്ടിലാക്കിയത്. ഇന്ത്യക്കാര്‍ ഖത്തര്‍ എയര്‍വേയ്‌സ് ബഹിഷ്‌കരിക്കുമെന്ന പ്രസ്താവനയില്‍ ഖത്തര്‍ എയര്‍വേയ്‌സ് മേധാവിയുമായി അല്‍ ജസീറ ജേണലിസ്റ്റ് നടത്തിയ അഭിമുഖം എന്ന നിലക്കാണ് പാരഡി വിഡിയോ ഡബ് ചെയ്തത്.

തങ്ങളുടെ പ്രധാന ഷെയര്‍ ഹോള്‍ഡറായ വാസുദേവ്, എയര്‍വേയ്‌സ് ബഹിഷ്‌കരിക്കുമെന്ന പ്രസ്താവന ഇറക്കിയതോടെ ഇനി എങ്ങനെ പ്രവര്‍ത്തിക്കുമെന്ന് ഞങ്ങള്‍ക്ക് അറിയില്ലെന്ന് സി.ഇ.ഒ പറയുന്നതായാണ് വിഡിയോയില്‍ ഡബ് ചെയ്തിരുന്നത്. പരിഹാസ രൂപേണ സി.ഇ.ഒ വാസുദേവിനോട് ബഹിഷ്‌കരണം പിന്‍വലിക്കാന്‍ അഭ്യര്‍ഥിക്കുന്നതായും വിഡിയോയില്‍ കാണിച്ചിരുന്നു.

എന്നാല്‍ ഇത് പാരഡി വിഡിയോയാണെന്ന് തിരിച്ചറിയാതെ കങ്കണ വിഡിയോക്കെതിരെ സമൂഹമാധ്യമങ്ങളില്‍ രംഗത്തെത്തുകയായിരുന്നു. ദരിദ്രനായ ഒരു വ്യക്തിയെ കളിയാക്കാന്‍ ഈ വിഡ്ഢിക്ക് ഒരു മടിയുമില്ലെന്ന് താരം ഇന്‍സ്റ്റാഗ്രാം സ്റ്റോറിയിലെഴുതി.

'നിങ്ങളെപ്പോലുള്ള ഒരു പണക്കാരനെ സംബന്ധിച്ചിടത്തോളം വാസുദേവ് ദരിദ്രനും നിസ്സാരനുമായിരിക്കാം. പക്ഷേ അവന്റെ സങ്കടവും വേദനയും നിരാശയും ഏത് സാഹചര്യത്തിലും പ്രകടിപ്പിക്കാന്‍ അവന് അവകാശമുണ്ട് . ഈ ലോകത്തിനപ്പുറം നാമെല്ലാവരും തുല്യരായ ഒരു ലോകമുണ്ടെന്ന് ഓര്‍ക്കുക .,' തുടങ്ങിയ നിരവധി പ്രതികരണങ്ങള്‍ താരം പങ്കുവെച്ചിരുന്നു.

ഇത്തരത്തിലുള്ള പ്രതികരണങ്ങള്‍ രേഖപ്പെടുത്തുന്നതിന് മുമ്പ് ആരായാലും ആ വിഡിയോയുടെ നിജസ്ഥിതി പരിശോധിക്കാന്‍ ശ്രമിക്കില്ലേയെന്നാണ് നെറ്റിസണ്‍സ് ചോദിക്കുന്നത്.