മക്ക: മദീന വഴിയുള്ള തീര്‍ഥാടകരുടെ വരവ് പൂര്‍ത്തിയായി. ഇതുവരെയായി അര ലക്ഷത്തിലധികം ഇന്ത്യന്‍ തീര്‍ഥാടകരാണ് പുണ്യ ഭൂമിയില്‍ എത്തിയത്. രാജ്യത്തെ വിവിധ സംസ്ഥാനങ്ങളിലായി 22 എംബാര്‍ക്കേഷന്‍ കേന്ദ്രങ്ങളില്‍ നിന്നായി 1,00,020 തീര്‍ഥാടകരാണ് ഹജ്ജ് കമ്മിറ്റി മുഖേനയെത്തുന്നത്.
36,000 പേര്‍ സ്വകാര്യ ഗ്രൂപ്പുകള്‍ വഴിയുമാണ് എത്തുക. ഇതില്‍ സ്വകാര്യ ഗ്രൂപ്പുകള്‍ മുഖേനയുള്ള തീര്‍ഥാടകരില്‍ ഭൂരിഭാഗവും ഇവിടെ എത്തിയിട്ടുണ്ട്. ലക്‌നൗവില്‍ നിന്നുള്ള 300 ഹാജിമാരും കൊല്‍ക്കത്തയില്‍ നിന്നുള്ള 450 ഹാജിമാരുമാണ് സഊദി എയര്‍ലൈന്‍സില്‍ അവസാനമായി എത്തിയത്. മദീന വഴി 54,140 തീര്‍ഥാടകരാണ് എത്തിച്ചേര്‍ന്നത്.
 കേരള ഹജ്ജ് കമ്മിറ്റി മുഖേന ഇന്ന് ജിദ്ദയിലെത്തുന്ന മലയാളി തീര്‍ഥാടകരുടെ ആദ്യ സംഘത്തെ സ്വീകരിക്കാനായി വിവിധ മലയാളി സംഘടനകളുടെ വളണ്ടിയര്‍മാര്‍ രംഗത്തുണ്ട്.
അതേസമയം, തീര്‍ഥാടകര്‍ക്കുള്ള സിം കാര്‍ഡ് വിതരണം ഇപ്പോഴും അനിശ്ചിതാവസ്ഥയില്‍ തുടരുകയാണ്. താമസസ്ഥലങ്ങളില്‍ സിം കാര്‍ഡുകള്‍ എത്തിച്ചു നല്‍കുമെന്ന് അറിയിച്ചിരുന്നെങ്കിലും ഇത്രയും വലിയ തോതിലുള്ള സിം കാര്‍ഡ് വിതരണം തീര്‍ത്തും അവതാളത്തിലാണ്.
കാര്‍ഡ് വിതരണത്തിനായി താമസ സ്ഥലങ്ങളില്‍  പ്രത്യേക കേന്ദ്രങ്ങള്‍ സജ്ജീകരിച്ചു വിതരണം നടത്തുവാനാണ് ഇപ്പോഴത്തെ പദ്ധതി.