ന്യൂഡൽഹി
പ്രവാചക വിരുദ്ധ പരാമർശത്തിൽ ബി.ജെ.പി വക്താവ് നൂപുർ ശർമയ്ക്കും നവീൻ ജിൻഡാലിനുമെതിരേ കേസെടുത്ത് ഡൽഹി പൊലിസ്. വിഷയത്തിൽ സമൂഹമാധ്യമങ്ങളിൽ വിദ്വേഷ പ്രചാരണം നടത്തുകയും നൂപുർ ശർമയടക്കമുള്ളവരെ വിമർശിക്കുകയും ചെയ്തവർക്കെതിരേയും കൂട്ടത്തോടെ കേസെടുത്തിട്ടുണ്ട്.
എ.ഐ.എം.ഐ.എം നേതാവ് അസദുദ്ദീൻ ഉവൈസി, മാധ്യമപ്രവർത്തക സാബ നഖ് വി, ഹിന്ദു മഹാസഭാ ഭാരവാഹി പൂജ ശകുൻ പാണ്ഡെ, ഹിന്ദു മഹാസഭ നേതാവും വിവാദ ധർമ സൻസദ് സംഘാടകനുമായ യതി നരസിംഹാനന്ദ്, രാജസ്ഥാനിലെ മൗലാന മുഫ്തി നദീം, പീസ് പാർട്ടി മുഖ്യ വക്താവ് ഷദാബ് ചൗഹാൻ, ഗുൽസാർ അൻസാരി, അനിൽകുമാർ മീണ തുടങ്ങി 30 ലധികം പേർക്കെതിരേയാണ് ഡൽഹി പൊലിസ് രണ്ടു എഫ്.ഐ.ആറുകളായി കേസ് രജിസ്റ്റർ ചെയ്തത്.
ഇവരുടെ സമൂഹ മാധ്യമ പോസ്റ്റുകൾ രണ്ട് സമുദായങ്ങൾ തമ്മിൽ ശത്രുതയ്ക്കും മതവികാരം വ്രണപ്പെടുന്നതിനും കാരണമായെന്ന് ചൂണ്ടിക്കാട്ടിയാണ് കേസെടുത്തിരിക്കുന്നത്. ഇന്ത്യൻ ശിക്ഷാ നിയമത്തിലെ 153, 295, 505 എന്നീ വകുപ്പുകളാണ് ചുമത്തിയിരിക്കുന്നത്. ഡൽഹി പൊലിസിന്റെ ഇന്റലിജൻസ് ഫ്യൂഷൻ ആൻഡ് സ്ട്രാറ്റജിക് ഓപ്പറേഷൻസ് യൂനിറ്റ് ഇവരുടെ പോസ്റ്റുകൾ നിരീക്ഷിച്ചു വരികയാണെന്നും അതിൽ മതവുമായി ബന്ധപ്പെട്ട ആക്ഷേപകരമായ പരാമർശങ്ങൾ കണ്ടെത്തിയെന്നും പൊലിസ് പറഞ്ഞു. നൂപുർ ശർമയുടെ പ്രവാചക നിന്ദ വിവാദമായതിനുപിന്നാലെ സോഷ്യൽമീഡിയയിലെ പരാമർശങ്ങളുടെ വിശദാംശങ്ങൾ തേടി ട്വിറ്റർ, ഫേസ്ബുക്ക്, മറ്റ് സമൂഹ മാധ്യമ പ്ലാറ്റ്ഫോമുകൾ എന്നിവയ്ക്ക് ഡൽഹി പൊലിസ് കത്തയച്ചിട്ടുണ്ട്.