ആലപ്പുഴ
മയക്കുമരുന്നുകേസില്‍ ജാമ്യം ലഭിച്ചത് കോടതി വളപ്പില്‍ കേക്ക് മുറിച്ച് ആഘോഷിച്ച് ഗുണ്ടാസംഘം. ഒട്ടേറെ ക്രിമിനല്‍ക്കേസുകളില്‍ പ്രതിയും ഗുണ്ടാത്തലവനുമായ എറണാകുളം മരട് ആനക്കാട്ട് വീട്ടില്‍ അനീഷ് ആൻ്റണിയും (മരട് അനീഷ്-37) സംഘവുമാണ് കഴിഞ്ഞ ദിവസം ആലപ്പുഴ കോടതി വളപ്പില്‍ ആഘോഷം നടത്തിയത്.

മരട് അനീഷ് കൂടാതെ കൂട്ടാളികളായ തൃപ്പൂണിത്തുറ ശിവസദനം വീട്ടിൽ കരുൺ (28), കഞ്ഞിക്കുഴി പഞ്ചായത്ത് അഞ്ചാംവാർഡിൽ കൊച്ചുവെളി അരുൺ (34) എന്നിവരെ ചൊവ്വാഴ്ചയാണ് എം.ഡി.എം.എയുമായി പൊലിസ് പിടികൂടിയത്. സുഹൃത്തിന്റെ ജന്മദിനമാഘോഷിക്കാനായി എത്തിയപ്പോഴായിരുന്നു ഇത്.ഇൗ കേസിൽ ആലപ്പുഴ കോടതിയില്‍ ഹാജരാക്കിയ പ്രതികള്‍ക്ക് കഴിഞ്ഞ ദിവസം ജാമ്യം ലഭിച്ചു. ഇതോടെ സംഘം കേക്ക് മുറിച്ച് കോടതി വളപ്പില്‍ ആഘോഷം നടത്തുകയായിരുന്നു. എന്നാല്‍ പൊലിസ് കഴിഞ്ഞ ദിവസം തടഞ്ഞ സുഹൃത്തിന്റെ ജന്മദിനഘോഷമാണ് നടത്തിയതെന്നാണ് സംഘത്തിൻ്റെ വിശദീകരണം.