ആലപ്പുഴ: കൊടകര കുഴല്‍പ്പണക്കേസില്‍ പ്രതികരണവുമായി വെള്ളാപ്പള്ളി നടേശന്‍. കുഴല്‍പ്പണം എല്ലാവരും കൊണ്ടുവരികയും തെരഞ്ഞെടുപ്പില്‍ ഉപയോഗപ്പെടുത്തുകയും ചെയ്യാറുണ്ടെന്നും ബി.ജെ.പിക്കാര്‍ മണ്ടന്മാരായതു കൊണ്ടാണ് പിടിക്കപ്പെട്ടതെന്നും അദ്ദേഹം പറഞ്ഞു.

കുഴല്‍പ്പണം ഇവിടെ കൊണ്ടുവരാത്തവര്‍ ആരാണ് ഉള്ളത്.തെരഞ്ഞെടുപ്പ് പ്രചാരണത്തിന് കോണ്‍ഗ്രസുകാര്‍ എവിടെ നിന്നാണ് പണം കൊണ്ടുവന്നതെന്ന് എനിക്കറിയാം. കോണ്‍ഗ്രസുകാര്‍ കുഴല്‍ അല്ലാതെ വേറെ വഴിയിലൂടെയാണ് കൊണ്ടുവന്നത്. മണ്ടന്മാരായത് കൊണ്ടാണ് ബി.ജെ.പിക്കാരുടെത് പിടിച്ചത്- വെള്ളാപ്പള്ളി പറഞ്ഞു.

അതേസമയം സംസ്ഥാനത്ത് പ്രതിപക്ഷം ഇല്ലാത്ത സ്ഥിതിയാണ്. ഉമ്മന്‍ ചാണ്ടിയുടെ കാലം കഴിഞ്ഞു. രമേശ് ചെന്നിത്തല നിരാശനായി കഴിയുകയാണ്. വി .ഡി സതീശന് നിയമസഭയില്‍ തിളങ്ങാനാകും. പക്ഷേ പുറത്തുള്ള പ്രവര്‍ത്തനത്തില്‍ അദ്ദേഹം വട്ടപൂജ്യമാണെന്നും വെള്ളാപ്പള്ളി പറഞ്ഞു.