റിയാദ്:  ഉംറ ചെയ്യാനോ തീർത്ഥാടനം ചെയ്യാനോ ആഗ്രഹിക്കുന്ന മുസ്ലീങ്ങൾക്ക് റമദാനിന് ശേഷവും ഇലക്ട്രോണിക് പെർമിറ്റ് നിർബന്ധമായി തുടരുമെന്ന് സഊദി അറേബ്യ അറിയിച്ചു. നുസുക്ക് അല്ലെങ്കിൽ തവക്കൽന ആപ്പുകൾ വഴിയാണ് പെർമിറ്റ് നൽകുന്നതെന്ന് രാജ്യത്തിന്റെ ഹജ്ജ്, ഉംറ മന്ത്രാലയം അറിയിച്ചു.

ഉംറ പെർമിറ്റ് ലഭിക്കുന്നതിന് അപേക്ഷകർ കോവിഡ്-19 ബാധിച്ചവരോ രോഗികളുമായി സമ്പർക്കം പുലർത്തുന്നവരോ ആയിരിക്കരുത്. റമദാനിന് ശേഷമുള്ള ഇസ്ലാമിക മാസമായ ഷവ്വാലിൽ ഉംറ ഏറ്റെടുക്കുന്നതിനുള്ള റിസർവേഷൻ ആരംഭിച്ചതായി മന്ത്രാലയം കഴിഞ്ഞ ആഴ്ച അറിയിച്ചിരുന്നു.

ഉംറ നിർവഹിക്കാനോ സഊദി അറേബ്യയിലെ പുണ്യസ്ഥലങ്ങൾ സന്ദർശിക്കാനോ ആഗ്രഹിക്കുന്ന മുസ്‌ലിംകൾക്ക് ആവശ്യമായ വിസകളും പെർമിറ്റുകളും നേടുന്നതിനും അനുബന്ധ പാക്കേജുകൾ ഇലക്ട്രോണിക് ആയി ബുക്ക് ചെയ്യുന്നതിനും നുസുക് ആപ്പ് വഴി സാധിക്കും.

കഴിഞ്ഞ മാസങ്ങളിൽ, ഉംറ നിർവഹിക്കാൻ എത്തുന്ന വിദേശ മുസ്ലീങ്ങൾക്ക് വേണ്ടി നിരവധി സൗകര്യങ്ങൾ സഊദി ഒരുക്കിയിട്ടുണ്ട്. പേഴ്‌സണൽ, വിസിറ്റ്, ടൂറിസം വിസകൾ എന്നിങ്ങനെ വിവിധ തരത്തിലുള്ള എൻട്രി വിസകൾ കൈവശമുള്ള മുസ്‌ലിംകൾക്ക് ഉംറ ചെയ്യാനും മുഹമ്മദ് നബി (സ)യുടെ ഖബറിടം സ്ഥിതി ചെയ്യുന്ന അൽ റൗദ അൽ ശരീഫ സന്ദർശിക്കാനും മദീനയിലെ പ്രവാചകന്റെ മസ്ജിദിൽ എത്താനും അനുവാദമുണ്ട്. ഇതിനായി ഒരു ഇ-അപ്പോയിന്റ്മെന്റ് ബുക്ക് ചെയ്‌താൽ മതി.

സഊദി അധികാരികൾ വിശ്വാസികളുടെ സൗകര്യത്തിനായി ഉംറ വിസ 30 ദിവസത്തിൽ നിന്ന് 90 ദിവസമായി നീട്ടിയിട്ടുണ്ട്. ഇതിന് പുറമെ എല്ലാ കര, വ്യോമ, കടൽ ഔട്ട്‌ലെറ്റുകൾ വഴിയും രാജ്യത്തേക്ക് പ്രവേശിക്കാനും ഏത് വിമാനത്താവളത്തിൽ നിന്നും പുറപ്പെടാനും അനുമതി നൽകിയിട്ടുണ്ട്.

എല്ലാവർഷവും നടത്തുന്ന ഹജ്ജ് കർമ്മങ്ങൾക്ക് എത്തിച്ചേരാൻ ശാരീരികമായും സാമ്പത്തികമായും താങ്ങാൻ കഴിയാത്ത ദശലക്ഷക്കണക്കിന് മുസ്ലീങ്ങൾ ആണ് ഉംറ ചെയ്യാനായി സഊദി അറേബ്യയിലേക്ക് ദിനംപ്രതി ഒഴുകുന്നത്.

കൂടുതല്‍ ഗള്‍ഫ് വാര്‍ത്തകള്‍ ലഭിക്കാന്‍ സുപ്രഭാതം വാട്‌സാപ്പ് കമ്യൂണിറ്റിയില്‍ ജോയിന്‍ ചെയ്യുക: https://chat.whatsapp.com/HVpI8bKnwZA7O8fvza77sv