ന്യൂഡല്‍ഹി: ജമ്മു കശ്മീരിലെ പുല്‍വാമയില്‍ ദര്‍ബ്ഗാം മേഖലയിലുണ്ടായ ഏറ്റുമുട്ടലില്‍ മൂന്ന് ലശ്കറെ ത്വയ്യിബ ഭീകരരെ സുരക്ഷ സേന വധിച്ചു. ഫസില്‍ നിസാര്‍ ബട്ട്, ഇര്‍ഫാന്‍ അഹ്മാലിക്, ജുനൈദ് ഷിഗോരി എന്നിവരാണ് ഏറ്റുമുട്ടലില്‍ കൊല്ലപ്പെട്ടത്. മെയ് 13ന് പൊലിസ് ഓഫിസര്‍ റിയാസ് അഹമ്മദിനെ വധിച്ചവരില്‍ ഒരാളാണ് കൊല്ലപ്പെട്ട ജുനൈദ് ഷിഗോരി എന്ന് പൊലിസ് അറിയിച്ചു.

സംഭവസ്ഥലത്തുനിന്നും തോക്കുകളും ആയുധങ്ങളും കണ്ടെത്തിയതായി കശ്മീര്‍ ഐ.ജി പി. വിജയ് കുമാര്‍ പറഞ്ഞു. കശ്മീരില്‍ ഒരുദിവസത്തിനിടെ നടക്കുന്ന രണ്ടാമത്തെ ഏറ്റുമുട്ടലാണിത്. തെക്കന്‍ കശ്മീരിലെ കുല്‍ഗാമില്‍ ഇന്നലെ നടന്ന ഏറ്റുമുട്ടലില്‍ ഹിസ്ല്‍ മുജാഹദീന്‍ ഭീകരനെ സുരക്ഷസേന വധിച്ചിരുന്നു. മരിച്ച ഭീകരന്‍ സുരക്ഷ ഉദ്യോഗസ്ഥരെ ആക്രമിച്ചതുള്‍പ്പടെ നിരവധികേസുകളിലെ പ്രതിയാണ്.