കായംകുളം :ലോക്ഡൗണിന്റെ പേരിൽ ഇത്രയേറെ പ്രതസന്ധികൾ നേരിടുന്ന വ്യാപാര മേഖലയെ കൂടുതൽ ദുരിതത്തിലാക്കുന്നതാവും ജൂൺ 16 വരെ ലോക്ഡൗൺ നീട്ടുവാനുള്ള തീരുമാനമെന്ന് കേരള വ്യാപാരി വ്യവസായി ഏകോപന സമിതി സംസ്ഥാന കമ്മിറ്റി . കടകൾ തുറന്ന് പ്രവർത്തിക്കണ്ട എന്ന ഈ തീരുമാനം വ്യാപാര സമൂഹത്തോടുള്ള നീതി നിഷേധമാണ്. കൊവിഡ് മാനദണ്ഡങ്ങൾ പാലിച്ച് തുറന്നു എല്ലാ കടകളും തുറന്നു പ്രവർത്തിക്കുവാൻ അനുവദിക്കണം. വ്യാപാരികൾ ആത്മഹത്യയുടെ വക്കിലാണെന്നും നേതാക്കൾ പറഞ്ഞു.

സംസ്ഥാന ബഡ്ജറ്റിൽ പോലും പരിഗണന ലഭിക്കാത്ത ഞങ്ങൾ എങ്ങനെ ജീവിക്കണമെന്നു കൂടി സർക്കാർ പറയണം. അടഞ്ഞു കിടക്കുന്ന വ്യാപാര സ്ഥാപനങ്ങളുടെ വായ്പകൾ അടക്കാത്തതിന്റെ പേരിൽ ഞങ്ങളുടെ സിബിൽ സ്കോറിൽ ഗണ്യമായ കുറവ് രേഖപ്പെടുത്തുന്നു. ബാങ്കുകൾക്ക് സർക്കാർ തലത്തിൽ മറ്റു നിർദ്ദേശങ്ങൾ ഒന്നും തന്നെ ഇല്ലാത്തതുകൊണ്ട് തന്നെ വിഷയത്തിൽ അവർക്ക് ഒന്നും ചെയ്യാൻ കഴിയില്ലായെന്നും പറയുന്നു. എല്ലാ ഇടപാടുകാർക്കും 2020 ഫെബ്രുവരി 28 ലെ സിബൽ സ്കോർ അതേ പടി നിലനിർത്തുവാൻ സർക്കാർ ഇടപെട്ട് അടിയന്തിര നടപടി സ്വീകരിക്കണം.

അടഞ്ഞു കിടക്കുന്ന ചെറുകിട വ്യാപാര സ്ഥാപനങ്ങൾക്ക് അടിയന്തിര സഹായ പാക്കേജ് പ്രഖ്യാപിക്കണമെന്നും സംസ്ഥാന പ്രസിഡന്റ് ശ്രീ. ജോബി. വി. ചുങ്കത്ത്, സംസ്ഥാന ഭാരവാഹികളായ സർവ്വശ്രീ. ടി. എഫ്. സെബാസ്റ്റ്യൻ, ആലിക്കുട്ടി ഹാജി, കമലാലയം സുകു, കെ. എസ്. രാധാകൃഷ്ണൻ, എസ്. എസ്. മനോജ്, നുജുമുദ്ദീൻ ആലുംമൂട്ടിൽ, എം. നസീർ, പ്രസാദ് ജോൺ മാമ്പ്ര, നിജാം ബഷി, പി. എം. എം. ഹബീബ്, വി. എ. ജോസ് ഉഴുന്നാലിൽ, ടോമി കുറ്റിയാങ്കൽ, ടി. കെ. ഹെൻറി എന്നിവർ ആവശ്യപ്പെട്ടു.