റിയാദ്: സഊദിയുടെ അതിര്‍ത്തിപ്രദേശമായ നജ്‌റാനില്‍ ഹൂതി ഷെല്ലാക്രമണത്തില്‍ ഒരു സ്വദേശി കൊല്ലപ്പെട്ടു. വിദേശികളായ ആറു പേര്‍ക്ക് പരുക്കേറ്റു. സഊദിയും യമനും അതിര്‍ത്തി പങ്കിടുന്ന നജ്‌റാനില്‍ ശനിയാഴ്ച്ച ഉച്ചയ്ക്കു ശേഷമാണ് ഹൂതികള്‍ റോക്കറ്റുകള്‍ തൊടുത്തുവിട്ടതെന്ന് സഊദി വാര്‍ത്താചാനലായ അല്‍ അഖ്‌റബിയ റിപ്പോര്‍ട്ട് ചെയ്തു.
പരുക്കേറ്റ ആറു പേരില്‍ അഞ്ചു പേരും യമന്‍ പൗരന്മാരാണ്. ഒരാള്‍ പാകിസ്താന്‍ സ്വദേശിയും.  നഗരത്തെ ലക്ഷ്യമാക്കി വിട്ട റോക്കറ്റ് രണ്ടു കെട്ടിടങ്ങളിലേക്ക് പതിച്ചു. കെട്ടിടങ്ങള്‍ പൂര്‍ണമായി കത്തിയമര്‍ന്നു. നേരത്തെ ഇവിടെ നടന്ന റോക്കറ്റാക്രമണങ്ങളില്‍ നിരവധി പേര്‍ കൊല്ലപ്പെട്ടിരുന്നു. യമനിലെ സമാധാന ചര്‍ച്ചകള്‍ വിഫലമായതിനെ തുടര്‍ന്ന് സഊദി സഖ്യ സൈന്യം ഹൂതികള്‍ക്കെതിരേ ആക്രമണങ്ങള്‍ ശക്തമാക്കിയിരുന്നു. ഇതിനുശേഷം ഹൂതി വിമതസേന വന്‍ നാശനഷ്ടം വരുത്തുന്ന നിരവധി ആക്രമണങ്ങളാണ് സഊദിക്കുനേരെ നടത്തിയത്.