ഛണ്ഡിഗഡ്: മുഖ്യമന്ത്രി അമരീന്ദര്‍ സിങ്ങും നവജ്യോത് സിങ് സിദ്ദുവും തമ്മിലുള്ള ശീതസമരത്തെ തുടര്‍ന്ന് പഞ്ചാബ് കോണ്‍ഗ്രസില്‍ രൂപപ്പെട്ട പ്രതിസന്ധി പരിഹരിക്കുന്നതിന് മുതിര്‍ന്ന നേതാവ് മല്ലികാര്‍ജുന്‍ ഖാര്‍ഗെയുടെ നേതൃത്വത്തിലുള്ള സമിതി ഫോര്‍മുല തയാറാക്കി. ഇതടങ്ങുന്ന റിപ്പോര്‍ട്ട് ഉടന്‍ പാര്‍ട്ടി ഇടക്കാല അധ്യക്ഷ സോണിയാഗാന്ധിക്ക് കൈമാറും.
ഫോര്‍മുല പ്രകാരം അമരീന്ദര്‍ സിങ് മുഖ്യമന്ത്രി സ്ഥാനത്ത് തുടരും. അടുത്ത വര്‍ഷം വരാനിരിക്കുന്ന തെരഞ്ഞെടുപ്പിലും അമരീന്ദറിനെ തന്നെയായിരിക്കും മുഖ്യമന്ത്രി പദവിയിലേക്ക് ഉയര്‍ത്തിക്കാട്ടുക. സിദ്ദുവിന് നിലവിലുള്ള മന്ത്രിസഭയില്‍ ഉപമുഖ്യമന്ത്രി പദവി നല്‍കിയേക്കും. സിദ്ദുവിനെ വീണ്ടും മന്ത്രിസഭയില്‍ ഉള്‍പ്പെടുത്തുന്നതില്‍ അമരീന്ദറിന് താല്‍പര്യമില്ല. എന്നാല്‍ ഇക്കാര്യത്തില്‍ സമിതി വ്യക്തമായ നിലപാട് സ്വീകരിച്ചിട്ടുണ്ടെന്നാണ് വിവരം. പഞ്ചാബ് പ്രദേശ് കോണ്‍ഗ്രസ് പ്രസിഡന്റായ സുനില്‍ ജാന്‍കറിനെയും മാറ്റിയേക്കും. അങ്ങനെ വന്നാല്‍ സിഖുകാരനല്ലാത്തൊരാളെയായിരിക്കും പാര്‍ട്ടി അധ്യക്ഷ സ്ഥാനത്തേക്ക് പരിഗണിക്കുക. കഴിഞ്ഞ ദിവസം കോണ്‍ഗ്രസ് നേതാക്കളുമായും മന്ത്രിമാരുമായും സമിതി ചര്‍ച്ച നടത്തിയിരുന്നു.