മഹാമൗനം തുടര്‍ന്ന് മുഖ്യമന്ത്രി, മാധ്യമങ്ങളോട് നോകമന്റ്‌സ്

ന്യുഡല്‍ഹി: എ.ഐ ക്യാമറ വിവാദത്തില്‍ ആരോപണത്തോട് പ്രതികരിക്കാതെ മുഖ്യമന്ത്രി. ദില്ലിയില്‍ മാധ്യമ പ്രവര്‍ത്തകര്‍ ആരോപണത്തെപ്പറ്റി ചോദിച്ചെങ്കിലും പ്രതികരിക്കാതെ പിണറായി ഒഴിഞ്ഞുമാറി. എ.ഐ ക്യാമറ വിവാദത്തില്‍ പ്രതിപക്ഷം ഉയര്‍ത്തിയ ആരോപണത്തെ പരിഹസിക്കുകയായിരുന്നു സി.പി.എം സംസ്ഥാന സെക്രട്ടറി എം.വി ഗോവിന്ദന്‍.
എഐ ക്യാമറ ഇടപാട് രണ്ടാം ലാവലിന് ആകണമെങ്കില്‍ ഒന്നാം ലാവലിന്‍ എന്തെങ്കിലും ആകണ്ടെയെന്നായിരുന്നു എം.വി ഗോവിന്ദന്റെ ചോദ്യം. സി.ബി.ഐ, ഇ.ഡി അന്വേഷണം വേണമെന്ന് പറയാത്തതെന്തന്ന് ചോദിച്ചാണ് യുഡിഎഫിന്റെ ജുഡിഷ്യല്‍ അന്വേഷണ ആവശ്യത്തെ അദ്ദേഹം പരിഹസിച്ചത്.

എഐ ക്യാമറ ഇടപാടില്‍ എസ്ആര്‍ഐടിക്കൊപ്പം പ്രവര്‍ത്തിച്ച പ്രസാഡിയോ കമ്പനി ഡയറക്ടര്‍ രാംജിത്തിനും ട്രോയ്‌സ് ഡയറക്ടര്‍ ജിതേഷിനും മുഖ്യമന്ത്രിയുമായുള്ള ബന്ധം അന്വേഷിക്കണമെന്നായിരുന്നു രമേശ് ചെന്നിത്തലയുടെ ആവശ്യം.. 83.6 കോടി രൂപക്ക് പദ്ധതി നടപ്പാക്കാമെന്ന് വ്യക്തമാക്കി എസ്ആര്‍ഐടി നല്‍കിയ പര്‍ച്ചേസ് കരാറും രമേശ് ചെന്നിത്തല പുറത്ത് വിട്ടു. എ.ഐ ക്യാമറ അഴിമതി രണ്ടാം ലാവലിന്‍ എന്ന് ആരോപിച്ച പ്രതിപക്ഷ നേതാവ് സര്‍ക്കാരിനോട് ഏഴ് ചോദ്യങ്ങളുന്നയിച്ചു. ജുഡീഷ്യല്‍ അന്വേഷണം വേണമെന്നാണ് യു.ഡി.എഫിന്റെ ആവശ്യം.

മുഖ്യമന്ത്രി മഹാമൌനം വെടിയണമെന്നായിരുന്നു വി.ഡി സതീശന്‍ ആവശ്യപ്പെട്ടത്.. എഐ ക്യാമറ ഇടപാട് രണ്ടാം ലാവ്‌ലിനാണെന്നും വി.ഡി സതീശന്‍ ആരോപിച്ചു. ഇതിനോടാണ് എം.വി ഗോവിന്ദന്‍ മറുപടി നല്‍കുകയും മുഖ്യമന്ത്രി പിണറായി വിജയന്‍ മൗനവൃതം തുടരുകയുമാണ്.