റിയോ ഡി ജനീറോ: പുരുഷ വിഭാഗം മാരത്തണില്‍ ഇന്ത്യക്ക് മെഡലില്ല. അവസാന ദിനത്തെ രണ്ടു മത്സരങ്ങളില്‍ ഇന്ത്യക്ക് കാര്യമായി തിളങ്ങാനായില്ല. മലയാളി താരം ടി.ഗോപി മാരത്തണില്‍ മത്സരിച്ചെങ്കിലും 25ാം സ്ഥാനത്താണ് ഫിനിഷ്  ചെയ്തത്. 2.15.25 സെക്കന്‍ഡിലായിരുന്നു ഫിനിഷിങ്. മറ്റൊരു ഇന്ത്യന്‍ താരം ഖേതാറാം 26ാം സ്ഥാനത്തും. നിതേന്ദ്ര സിങ് റാവത്ത് 84ാം സ്ഥാനത്തുമാണ് ഫിനിഷ് ചെയ്തത്.
അതേസമയം കെനിയയുടെ എല്യൂഡ് കിപ്‌ചോഗെ മികച്ച സമയത്തോടെ സ്വര്‍ണം നേടി. 2.08. 44 സെക്കന്‍ഡിലാണ് ഫിനിഷ് ചെയ്തത്. എത്യോപ്യയുടെ ഫെയിസ ലിലേസ വെള്ളിയും അമേരിക്കയുടെ ഗാലെന്‍ റുപ് വെങ്കലവും സ്വന്തമാക്കി.