കോഴിക്കോട്: വയനാട് മുട്ടില്‍ നിന്ന് ഈട്ടിമരം കടത്തിയ വാഹനം പിടികൂടി. കോഴിക്കോട് കൊടുവള്ളിയില്‍ നിന്ന് വനം വകുപ്പ് ഉദ്യോഗസ്ഥരാണ് വാഹനം പിടികൂടിയത്. മുട്ടില്‍ നിന്നും പെരുമ്പാവൂരിലേക്ക് ഈട്ടിമരം കടത്തിയ വാഹനം ആണ് പിടികൂടിയത്.

കുന്ദമംഗലം സ്വദേശിയുടേതാണ് വാഹനമെന്നാണ് അറിയുന്നത്. വാഹനം വയനാട്ടിലെ കല്‍പറ്റയിലേക്ക് കൊണ്ടുപോകും.

അതേസമയം, വനംകൊള്ളയ്ക്ക് പിന്നില്‍ വന്‍ മാഫിയ സംഘമാണെന്നാണ് സര്‍ക്കാര്‍ കോടതിയില്‍ വ്യക്തമാക്കിയിരിക്കുന്നത്. പുറത്തുവന്നത് മഞ്ഞുമലയുടെ അറ്റമാണെന്നും സര്‍ക്കാര്‍ അറിയിച്ചു. കേസ് അന്വേഷണം സ്റ്റേ ചെയ്യണമെന്ന പ്രതികളുടെ ആവശ്യം കോടതി തള്ളി.