ദമാം: ജന്മനാ രണ്ടു കൈകള്‍ക്കും കാലുകള്‍ക്കും ശേഷിയില്ലാതെ, വയറു കൊണ്ട് ഇഴഞ്ഞിഴഞ്ഞ് നടന്നുകൊണ്ട് തന്റെ വൈകല്യങ്ങള്‍ക്കെതിരെ പോരാടി വിശുദ്ധ ഖുര്‍ആന്‍ മനപ്പാഠമാക്കിയ സഊദി യുവാവ് ഓര്‍മയായി. അസീര്‍ പ്രവിശ്യയിലെ സാറ ഉബൈദയിലെ 35 കാരനായ സഊദി പൗരന്‍ ത്വാരിഖ് അല്‍ വാദിഇയാണ് ഇച്ഛാ ശക്തിക്ക് മുന്നില്‍ തലയുയര്‍ത്തി വിശുദ്ധ ഖുര്‍ആന്‍ മുഴുവനും മനപ്പാഠമാക്കി അവസാനം വിധിക്കു മുന്നില്‍ കീഴടങ്ങി യാത്രയായത്.

തന്റെ ഇച്ഛാ ശക്തിക്ക് മുന്നില്‍ പൊരുതി വിജയം നേടിയ യുവാവ് മറ്റുള്ളവര്‍ക്ക് വിസ്മയമായിരുന്നു. ഖുര്‍ആന്‍ പഠിക്കാന്‍ ആഗ്രഹം പ്രകടിപ്പിച്ച യുവാവിനെ നാല് വർഷം മുന്‍പ് പിതാവ് പ്രദേശത്തെ ഒരു ഖുര്‍ആന്‍ മദ്രസയില്‍ ചേര്‍ത്തെങ്കിലും ശാരീരിക പ്രയാസം മൂലം പഠനം മുടങ്ങുകയും പിന്നീട് വീട്ടില്‍ വന്നു പഠിപ്പിക്കാന്‍ ഒരു അധ്യാപകനെ സംഘടിപ്പിക്കുകയും ചെയ്തു.

വീട്ടില്‍ അദ്ധ്യാപകന്‍ എത്തുമ്പോള്‍ വീട്ടിലെ തന്നെ തന്റെ മുറിയില്‍ നിന്നും പഠന റൂമിലേക്ക് ഏകദേശം 15 മിനുട്ട് വയറില്‍ ഇഴഞ്ഞിഴഞ്ഞെത്തിയായിരുന്നു താരിഖ് പഠനം നടത്തിയത്. കൈകള്‍ തീരെ ഇല്ലാത്തതിനാല്‍ ചുണ്ടും നാവും കൊണ്ട് പേജുകള്‍ മറിച്ചാണ് ഖുര്‍ആന്‍ പഠനം നടത്തിയിരുന്നത്. വൈകല്യങ്ങളില്‍ തളരാതെ ഇച്ഛാശക്തിയില്‍ ഖുര്‍ആന്‍ പഠിക്കുകയെന്ന ആഗ്രഹം സാധിച്ചെടുത്ത ത്വാരിഖിന്റെ കഥ നേരത്തെ നേരത്തെ അറബ് മാധ്യമങ്ങളോടൊപ്പം സുപ്രഭാതവും വന്‍ പ്രാധാന്യത്തോടെ റിപ്പോര്‍ട്ട് ചെയ്തിരുന്നു.