ബെന്‍സേമയുടെ ഹാട്രിക് കരുത്തില്‍ അല്‍മേരിയയെ വീഴ്ത്തി റയല്‍ മാഡ്രിഡ്

സൂപ്പര്‍താരം കരീം ബെന്‍സേമയുടെ ഹാട്രിക് കരുത്തില്‍ ലാ ലിഗയില്‍ അല്‍ മേരിയയെ രണ്ടിനെതിരെ നാലു ഗോളുകള്‍ക്ക് വീഴ്ത്തി റയല്‍ മഡ്രിഡ്. മത്സരത്തിന്റെ അഞ്ചാം മിനിറ്റില്‍തന്നെ ബെന്‍സേമ ഗോളടി തുടങ്ങി. ബ്രസീല്‍ വിങ്ങര്‍ വിനീഷ്യസ് ജൂനിയറാണ് ഗോളിന് വഴിയൊരുക്കിയത്. 13ാം മിനിറ്റില്‍ റോഡ്രിഗോയുടെ അസിസ്റ്റിലൂടെ ബെന്‍സേമ ലീഡ് ഉയര്‍ത്തി. 42ാം മിനിറ്റില്‍ പെനാല്‍റ്റിയിലൂടെയാണ് താരം ഹാട്രിക് തികച്ചത്. ഒന്നാം പകുതിയുടെ ഇന്‍ജുറി ടൈമില്‍ ബ്രസീല്‍ താരം ലാസരോ മാര്‍ക്വെസിലൂടെ അല്‍ മേരിയ ഒരു ഗോള്‍ മടക്കി. 61ാം മിനിറ്റില്‍ അര്‍ജന്റൈന്‍ താരം ലൂകാസ് റോബര്‍ട്ടോണ്‍ അല്‍ മേരിയയുടെ രണ്ടാം ഗോള്‍ നേടി.

ഏപ്രിലില്‍ ബെന്‍സേമ നേടുന്ന മൂന്നാം ഹാട്രിക്കാണിത്. നേരത്തെ ബാഴ്‌സലോണ, റയല്‍ വല്ലാഡോലിഡ് ടീമുകള്‍ക്കെതിരെയും ഹാട്രിക്ക് നേടിയിരുന്നു. ഇതോടെ ലാ ലിഗ ചരിത്രത്തില്‍ ഏറ്റവും കൂടുതല്‍ ഗോള്‍ നേടുന്ന നാലാമത്തെ താരമെന്ന നേട്ടം ബെന്‍സേമ സ്വന്തമാക്കി. ഹ്യൂഗോ സാഞ്ചസിനെയാണ് താരം മറികടന്നത്.

ലാ ലിഗയുടെ ചരിത്രത്തില്‍ 474 ഗോളുകളുമായി അര്‍ജന്റൈന്‍ സൂപ്പര്‍താരം ലയണല്‍ മെസ്സിയാണ് ഗോള്‍വേട്ടക്കാരില്‍ ഒന്നാമത്. ക്രിസ്റ്റ്യാനോ റൊണാള്‍ഡോ (311 ഗോളുകള്‍), ടെല്‍മോ സാറ (252) എന്നിവരാണ് രണ്ടും മൂന്നും സ്ഥാനങ്ങളില്‍.