തിരുവനന്തപുരം: സ്വര്‍ണക്കടത്ത് പ്രതി സ്വപ്‌ന സുരേഷിന്റെ സത്യവാങ്മൂലത്തല്‍ മുന്‍ സ്പീക്കര്‍ പി ശ്രീരാമകൃഷ്ണന്‍, മുന്‍മന്ത്രി കെ.ടി ജലീല്‍ എന്നിവര്‍ക്കെതിരെ ഗുരുതര ആരോപണങ്ങള്‍. ഷാര്‍ജയില്‍ കോളജിന് ഭൂമി ലഭിക്കുന്നതിനായി ഷാര്‍ജ ഭരണാധികാരിയുമായി ശ്രീരാമകൃഷ്ണന്‍ കൂടിക്കാഴ്ച്ചയ്ക്ക് ആവശ്യപ്പെട്ടുവെന്നും കോണ്‍സുലേറ്റ് ജനറലിന് കോഴ നല്‍കിയിയെന്നും സ്വപ്‌ന ആരോപിക്കുന്നു.

രഹസ്യമൊഴി നല്‍കുന്നതിന്റെ ഭാഗമായി നല്‍കിയ സത്യവാങ്മൂലത്തില്‍ സ്വപ്‌ന നല്‍കിയിട്ടുള്ള വിവരങ്ങളാണ് ഇപ്പോള്‍ പുറത്തുവന്നുകൊണ്ടിരിക്കുന്നത്. മുംബൈ ആസ്ഥാനമായി പ്രവര്‍ത്തിക്കുന്ന ഫ്‌ളൈ ലോജിസ്റ്റിക് ഉടമ മാധവന്‍ വാര്യര്‍ കെ.ടി ജലീലിന്റെ ബിനാമിയാണെന്നും ജലീലിന്റെ ഇടപാടുകള്‍ക്ക് മാധവന്‍ വാര്യര്‍ മുന്നില്‍ നിന്നിട്ടുണ്ടെന്നും സ്വപ്‌ന സത്യവാങ്മൂലത്തില്‍ പറയുന്നു.

ഷാര്‍ജാ ഭരണാധികാരിക്ക് ഡി.ലിറ്റ് നല്‍കാന്‍ ജലീല്‍ സമ്മര്‍ദ്ദം ചെലുത്തിയെന്നും ആരോപണമുണ്ട്. ഇതിനായി കാലിക്കറ്റ് സര്‍വകലാശാല വൈസ് ചാന്‍സലര്‍ കെ മുഹമ്മദ് ബഷീറിനെ സ്വാധീനിച്ചുവെന്നും സ്വപ്‌ന ആരോപിക്കുന്നു.

കള്ളപ്പണഇടപാടിലും സ്വര്‍ണക്കടത്തിലുമെല്ലാം കേന്ദ്ര ഏജന്‍സികള്‍ അന്വേഷണം തുടങ്ങിയപ്പോള്‍ തന്നെ ആരോപണ നിഴലിലായ വ്യക്തികളാണ് കെ.ടി ജലീലും മുന്‍ സ്പീക്കര്‍ പി ശ്രീരാമകൃഷ്ണനും.

അതേസമയം, കെ.ടി. ജലീല്‍ നല്‍കിയ പരാതിയിന്മേല്‍ സ്വപ്‌നയുടെ രഹസ്യ മൊഴിയുടെയും സത്യവാങ്മൂലത്തിന്റെയും പകര്‍പ്പ് വേണമെന്ന് ആവശ്യപ്പെട്ട് ക്രൈം ബ്രാഞ്ച് കോടതിയെ സമീപിച്ചു.