കൊച്ചി: മറൈന്‍ ഡ്രൈവിലെ ഫ്്‌ളാറ്റില്‍ യുവതി ക്രൂരപീഡനത്തിനിരയായ സംഭവത്തിലെ പ്രതി മാര്‍ട്ടിന്‍ ജോസഫിനെ പിടികൂടുന്നതില്‍ പൊലിസിനുണ്ടായ വീഴ്ച്ച തുറന്നുസമ്മതിച്ച് സിറ്റി പൊലിസ് കമ്മിഷണര്‍ സി.എച്ച് നാഗരാജു. മാധ്യമങ്ങളില്‍ വന്ന വാര്‍ത്തയും ദൃശ്യങ്ങളും കണ്ടപ്പോഴാണ് ക്രൂരതയെക്കുറിച്ച് മനസിലായത്. കേസ് മേലേത്തട്ടിലേക്ക് റിപ്പോര്‍ട്ട് ചെയ്യുന്നത് വൈകി. സംഭവത്തില്‍ വകുപ്പുതല അന്വേഷണം ആരംഭിച്ചിട്ടുണ്ടെന്നും അദ്ദേഹം പറഞ്ഞു.

പ്രതി മാര്‍ട്ടിന്‍ ജോസഫിനെതിരെ മറ്റൊരു യുവതിയും സമാനമായ പരാതി നല്‍കിയിട്ടുണ്ട്. ആ കേസും വിശദമായി അന്വേഷിക്കും. മാത്രമല്ല മാര്‍ട്ടിന്‍ ജോസഫിന്റെ വരുമാനമാര്‍ഗങ്ങളെക്കുറിച്ചും കൂടുതല്‍ അന്വേഷണമുണ്ടാകുമെന്നും അദ്ദേഹം പറഞ്ഞു.

അതേസമയം, വീടുകളിലെ കുറ്റകൃത്യങ്ങള്‍ തടയുന്നതിനും കൊച്ചി സിറ്റി പൊലിസ് നടപടികള്‍ ആരംഭിച്ചു. റസിഡന്‍സ് അസോസിയേഷനുകളുടേയും നാട്ടുകാരുടേയും സഹായം തേടും. ഫ്‌ളാറ്റുകളില്‍ സംശയാസ്പദമായ സാഹചര്യങ്ങളില്‍ താമസിക്കുന്നവരുണ്ടെങ്കില്‍ കണ്ടെത്തും. ഒരു മാസം പത്തുകേസെങ്കിലും ഇത്തരത്തില്‍ റിപ്പോര്‍ട്ട് ചെയ്യപ്പെടുന്നുണ്ടെന്നും കമ്മിഷണര്‍ മാധ്യമങ്ങളോട് പറഞ്ഞു.