കോഴിക്കോട്: കൊവിഡിനേക്കാള്‍ മാരകമായ വൈറസാണിന്ന് സമൂഹത്തെ ഗ്രസിച്ചുകൊണ്ടിരിക്കുന്നതെന്നും മതവിരോധത്തിന്റെയും വര്‍ഗീയതയുടെയും ആ വൈറസ് പടര്‍ന്നു പിടിക്കുന്ന അവസ്ഥ ഇല്ലാതാക്കണമെന്നും പ്രശസ്ത കഥാകൃത്ത് പി.കെ പാറക്കടവ്. കലയും സാഹിത്യവും തമ്മിലടിപ്പിക്കാനല്ല, തമ്മിലടുപ്പിക്കാനാണെന്നും അദ്ദേഹം കൂട്ടിച്ചേര്‍ത്തു.
തിക്കോടിയില്‍ യുവ എഴുത്തുകാരി ഷഹാന നിജാസ് എഴുതിയ വിന്‍സന്റിന്റെ പ്രണയിനി എന്ന അനുഭവങ്ങളുടേയും ഓര്‍മകളുടേയും പുസ്തകം പ്രകാശനം ചെയ്യുകയായിരുന്നു അദ്ദേഹം. ഓട്ടപ്പാച്ചിലുകളുടെ കാലത്ത് ഇഴഞ്ഞുനീങ്ങുന്ന ഒച്ചുപോലും ഒരു വിപ്ലവകാരിയാണ്. ഒച്ച് പ്രതിരോധത്തിന്റെ ബിംബമായി മാറുന്നു. വായന യാതനയായി മാറിയ കാലത്ത് വായിപ്പിക്കുന്ന പുസ്തകം എഴുതുക എന്നത് മഹത്തായ കാര്യമാണെന്നും അദ്ദേഹം പറഞ്ഞു. പേരക്ക ബുക്‌സാണ് പ്രസാധകര്‍.
ചടങ്ങില്‍ ചന്ദ്രശേഖരന്‍ തിക്കോടി പുസ്തകം ഏറ്റുവാങ്ങി. ഡോ. സോമന്‍ കടലൂര്‍ മുഖ്യാതിഥിയായി. ഇബ്രാഹിം തിക്കോടി പുസ്തകത്തെ പരിചയപ്പെടുത്തി. ഹാഷിം മാസ്റ്റര്‍ അധ്യക്ഷനായി. ഹംസ ആലുങ്ങല്‍, സഹദ് പുറക്കാട്, നിസാം മുഹമ്മദ് സലീം, ടി.വി അബ്ദുല്‍ ഗഫൂര്‍ മാസ്റ്റര്‍, പി. ഖാലിദ്, കുഞ്ഞബ്ദുല്ല തിക്കോടി, അരുണ്‍ നാരായണന്‍ പ്രസംഗിച്ചു. ഷഹാന നിജാസ് മറുപടി പ്രസംഗം നടത്തി.