റൂസോ: വായ്പാതട്ടിപ്പ് നടത്തിയ മുങ്ങിയ വജ്രവ്യാപാരി മെഹുല്‍ ചോക്‌സിയുടെ ജാമ്യം ഡൊമനിക്ക ഹൈക്കോടതി നിഷേധിച്ചു. രാജ്യം വിടാനുള്ള സാധ്യത കണക്കിലെടുത്താണ് ജാമ്യം നിഷേധിച്ചത്.

ചോക്സിക്ക് ഡൊമിനിക്കയുമായി യാതൊരു ബന്ധവുമില്ലാത്തതിനാല്‍ ഒളിച്ചോടില്ലെന്ന് ഉറപ്പ് നല്‍കാന്‍ കോടതിക്ക് കഴിയില്ലെന്നും ജഡ്ജി പറഞ്ഞു. ചോക്‌സി ഇന്ത്യന്‍ പൗരനാണെന്ന് ഡൊമനിക്കന്‍ പ്രധാനമന്ത്രി കഴിഞ്ഞ ദിവസം വ്യക്കമാക്കിയിരുന്നു.

ചോക്‌സിക്ക് ശാരീരിക പ്രശ്നങ്ങളുണ്ടെന്നും അതിനാല്‍ ജാമ്യം അനുവദിക്കണമെന്നും ജാമ്യം അനുവദിച്ചാല്‍ നിയമനടപടികള്‍ തീരുന്നതുവരെ ഡൊമിനിക്കയില്‍ തന്നെ തുടരുമെന്നും മെഹുല്‍ ചോക്‌സിയുടെ അഭിഭാഷകന്‍ കോടതിയില്‍ വ്യക്തമാക്കിയിരുന്നു.

മജിസ്ട്രേറ്റ് ജാമ്യാപേക്ഷ നിരസിച്ചതിനെത്തുടര്‍ന്നാണ് ചോക്സി ഹൈക്കോടതിയെ സമീപിച്ചത്. ചോക്സിയെ തിങ്കളാഴ്ച്ച വീണ്ടും കോടതിയില്‍ ഹാജരാകും.

ആന്റിഗ്വയില്‍ നിന്ന് ക്യൂബയിലേക്ക് രക്ഷപ്പെടുന്നതിനിടെയാണ് ചോക്സി ഡൊമിനിക്കയില്‍ പിടിയിലാകുന്നത്. ചോക്സിക്കെതിരെ ഇന്റര്‍പോള്‍ ലുക്ക്ഔട്ട് നോട്ടിസ് പുറത്തിറക്കിയിരുന്നു.