ബഗ്ദാദ്: ചാവേര്‍ ആക്രമണങ്ങള്‍ക്ക് ഐ.എസ് കുട്ടികളെ വ്യാപകമായി ഉപയോഗിക്കുന്നു. കഴിഞ്ഞദിവസം തുര്‍ക്കിയിലെ ഗസിന്ദിപില്‍ കുര്‍ദ് വിഭാഗത്തിന്റെ വിവാഹ ചടങ്ങിനിടെ കുട്ടിച്ചാവേര്‍ നടത്തിയ സ്‌ഫോടനത്തിനു പിന്നാലെ ഇറാഖില്‍ 13കാരനെ ബെല്‍റ്റ് ബോംബുമായി പിടികൂടി. കിര്‍കുക് നഗരത്തില്‍ ബെല്‍റ്റ് ബോംബുമായെത്തിയ കുട്ടിയെ പൊലിസ് പിടികൂടി ബോംബ് നിര്‍വീര്യമാക്കുന്നതിന്റെ ദൃശ്യങ്ങളും പുറത്തുവന്നു. കിര്‍കുക്കിലെ ശിഈ പള്ളിയിലാണ് ആക്രമണത്തിന് പദ്ധതിയിട്ടതെന്ന് പൊലിസ് പറഞ്ഞു.

ശനിയാഴ്ച രാത്രി തുര്‍ക്കിയില്‍ നടത്തിയ ആക്രമണത്തിന്റെ സമാനരീതിയിലാണ് കിര്‍കുക്കിലും ഐ.എസ് കുട്ടിച്ചാവേറിനെ ഉപയോഗിച്ച് ആക്രമണത്തിനു ശ്രമിച്ചത്. 54 പേരാണ് തുര്‍ക്കിയില്‍ കൊല്ലപ്പെട്ടത്. 24 മണിക്കൂറിനിടെയാണ് ഐ.എസ് വീണ്ടും സമാനരീതിയിലുള്ള ആക്രമണത്തിനു തുനിഞ്ഞത്. കിര്‍കുക് നഗരത്തില്‍ ബാഴ്‌സലോണയുടെ ഫുട്‌ബോള്‍ ടീഷര്‍ട്ട് അണിഞ്ഞെത്തിയ 12നും 13നും ഇടയില്‍ പ്രായമുള്ള കുട്ടിയാണ് ചാവേറാക്രമണത്തിന് എത്തിയത്. ഇറാഖി പൊലിസ് പിടികൂടിയതോടെ 13 വയസുകാരന്‍ പൊട്ടിക്കരഞ്ഞു.

പരിശോധനയില്‍ ബെല്‍റ്റ്‌ബോംബ് കണ്ടെത്തി. പൊലിസുകാര്‍ ഏറെ പണിപ്പെട്ടാണ് ബോംബ് അഴിച്ചെടുത്തത്. കുട്ടിയെ മാറ്റിനിര്‍ത്തിയ ശേഷം ബോംബ് സ്‌ഫോടനത്തിലൂടെ നിര്‍വീര്യമാക്കി. അതിനിടെ ഞായറാഴ്ച രാത്രി രണ്ടിടത്ത് ചാവേര്‍ ആക്രമണം നടന്നു. മൂന്നു പേര്‍ക്കാണ് ഇതില്‍ പരുക്കേറ്റത്.