ജലീല്‍ അരൂക്കുറ്റി

കവരത്തി: ലക്ഷദ്വീപ് വിഷയത്തിലും ഐഷ സുല്‍ത്താനയ്‌ക്കെതിരേ ബി.ജെ.പി ദ്വീപ് ഘടകം പ്രസിഡന്റ് അബ്ദുല്‍ ഖാദര്‍തന്നെ പൊലിസില്‍ പരാതി നല്‍കിയതിലും ബി.ജെ.പി സംസ്ഥാന ഘടകത്തില്‍ കലഹം രൂക്ഷമായി. ഇതോടെ രണ്ട് സംസ്ഥാന ജനറല്‍ സെക്രട്ടറിമാരില്‍ ഒരാളും മുന്‍ ലോക്‌സഭാ സ്ഥാനാര്‍ഥിയുമായ എം.പി സെയ്തുമുഹമ്മദ് കോയയും വൈസ് പ്രസിഡന്റ് ഹബീബുള്ളയും രാജിക്കത്ത് നല്‍കി. ദ്വീപ് ഘടകത്തിന്റെ ചുമതലക്കാരനായ ദേശീയ വൈസ് പ്രസിഡന്റ് അബ്ദുല്ലക്കുട്ടിക്കും സംസ്ഥാന പ്രസിഡന്റിനുമെതിരേ ഇന്നലെ ചേര്‍ന്ന ഓണ്‍ലൈന്‍ യോഗത്തില്‍ രൂക്ഷ വിമര്‍ശനമാണുയര്‍ന്നത്. ദ്വീപില്‍ കൂട്ടരാജി തുടരുന്ന പശ്ചാത്തലത്തില്‍ അബ്ദുല്ല കുട്ടിയുടെ സാന്നിധ്യത്തില്‍ ചേര്‍ന്ന യോഗത്തില്‍ ഭൂരിഭാഗം നേതാക്കളും കടുത്ത വിമര്‍ശനമാണ് ഉയര്‍ത്തിയത്.
ജനറല്‍ സെക്രട്ടറിമാരായ എച്ച്.കെ മുഹമ്മദ് കാസിമും എം.പി സെയ്തു മുഹമ്മദും മുന്‍ ജനറല്‍ സെക്രട്ടറി എ ജാഫര്‍ ഷായും രൂക്ഷമായ വിമര്‍ശനമാണ് നടത്തിയത്. ഐഷ സുല്‍ത്താനയുടെ പ്രസ്താവനക്കെതിരേ പ്രതിഷേധിക്കാന്‍ മാത്രമാണ് കഴിഞ്ഞദിവസം ചേര്‍ന്ന യോഗത്തില്‍ തീരുമാനിച്ചത്. എന്നാല്‍ നിയമ നടപടി സ്വീകരിക്കണമെന്ന തീരുമാനം എടുത്തിട്ടില്ലെന്നും അത് പ്രഭാരിയായ അബ്ദുല്ലക്കുട്ടിയും സംസ്ഥാന പ്രസിഡന്റും ചേര്‍ന്നെടുത്ത തീരുമാനമാണെന്നും ഇത് പുനപരിശോധിക്കണമെന്നും ജാഫര്‍ ഷാ ആവശ്യപ്പെട്ടു. ഇതിനെ പിന്തുണച്ച മുഹമ്മദ് കാസിം, ജനങ്ങള്‍ക്ക് ഇഷ്ടമില്ലാത്ത തീരുമാനങ്ങളെടുത്തതുവഴി ബി.ജെ.പിയെ ദ്വീപില്‍ നിന്ന് ഇല്ലാതാക്കാന്‍ ശ്രമിക്കരുതെന്ന് അബ്ദുല്ലക്കുട്ടിയോട് ആവശ്യപ്പെട്ടു.

ലക്ഷദ്വീപിന് വേണ്ടി പ്രഭാരിയും സംസ്ഥാന പ്രസിഡന്റും എന്തു ചെയ്‌തെന്ന് വ്യക്തമാക്കണമെന്നാവശ്യപ്പെട്ട മുഹമ്മദ് കാസിം, അവശേഷിക്കുന്നവരെയും പാര്‍ട്ടിയില്‍ നിന്ന് ഇല്ലാതാക്കരുതെന്ന് ആവശ്യപ്പെട്ടു. നേതാക്കളുടെ ശബ്ദസന്ദേശം ചോര്‍ന്നതും വിവാദമായി. കഴിഞ്ഞ ദിവസത്തെ കൂട്ടരാജിക്ക് പിന്നാലെ കവരത്തിക്ക് പുറമേ മറ്റു ദ്വീപുകളില്‍ നിന്നും നിരവധി പ്രവര്‍ത്തകര്‍ രാജിവച്ചു. വരും ദിവസങ്ങളില്‍ കൂടുതല്‍ പേര്‍ പാര്‍ട്ടി വിടും.