ദുബായ്: യുഎഇയിൽ കുറഞ്ഞ വേതനത്തിൽ തൊഴിലെടുക്കുന്നവർക്ക് ആശ്വാസ വാർത്തയുമായി മാനവ വിഭവശേഷി, എമിറേറ്റൈസേഷൻ മന്ത്രാലയം (MOHRE). ഇത്തരത്തിൽ തൊഴിലെടുക്കുന്നവർക്ക് അവർ തൊഴിലെടുക്കുന്ന സ്ഥാപനം താമസ സൗകര്യം നൽകണമെന്നാണ് മന്ത്രാലയത്തിന്റെ പുതിയ തീരുമാനം. 1,500 ദിർഹമോ അതിൽ കുറവോ ശമ്പളം വാങ്ങുന്നവർക്കാണ് ഇത്തരത്തിൽ താമസ സൗകര്യം നൽകേണ്ടത്.

മാനവ വിഭവശേഷി, എമിറേറ്റൈസേഷൻ മന്ത്രാലയത്തിന്റെ നിർദേശ പ്രകാരം 50 തൊഴിലാളികളോ അതിൽ കൂടുതലോ ജോലി ചെയ്യുന്ന സ്ഥാപനവും തൊഴിലാളികൾക്ക് താമസ സൗകര്യം ഒരുക്കണം. താമസ സൗകര്യം ഒരുക്കുമ്പോൾ പൊതു മാനദണ്ഡങ്ങൾ പാലിക്കുകയും എല്ലാ സേവനങ്ങൾ നൽകുകയും വേണം. 1,500 ദിർഹമോ അതിൽ കുറവോ ശമ്പളം വാങ്ങുന്നവർക്കുള്ള താമസ സൗകര്യത്തിലും ഇത്തരം കാര്യങ്ങൾ ശ്രദ്ധിക്കണം.

ലേബർ റിലേഷൻസ് റെഗുലേഷൻ നിയമമനുസരിച്ച്, തൊഴിലുടമകൾ അപകടങ്ങളിൽ നിന്നും പരിക്കുകളിൽ നിന്നും അസുഖങ്ങളിൽ നിന്നും ഉചിതമായ സംരക്ഷണം നൽകുന്ന താമസ സൗകര്യമാണ് ഒരുക്കേണ്ടത്. 500-ൽ താഴെ തൊഴിലാളികൾക്കായി നിശ്ചയിച്ചിട്ടുള്ള താമസ സൗകര്യ മാനദണ്ഡങ്ങൾ പാലിക്കണം.

ജോലി സമയത്ത്, തീപിടുത്തം, യന്ത്രങ്ങളുടെ ഉപയോഗത്തിന്റെ ഫലമായുണ്ടാകുന്ന അപകടങ്ങൾ എന്നിവ സംഭവിക്കാതിരിക്കാൻ മന്ത്രാലയം നിശ്ചയിച്ച പ്രതിരോധ മാർഗ്ഗങ്ങൾ പിന്തുടരണം. തൊഴിലിന്റെ അപകടസാധ്യതകളെക്കുറിച്ച് തൊഴിലുടമകൾ ജോലി സ്വീകരിക്കുന്നതിന് മുമ്പ് തൊഴിലാളികളെ അറിയിക്കണമെന്നും മന്ത്രാലയം നിർദേശിക്കുന്നു. അറബിയിലും തൊഴിലാളികൾക്ക് മനസ്സിലാകുന്ന മറ്റൊരു ഭാഷയിലുമാണ് നിർദേശങ്ങൾ നൽകേണ്ടത്.