തിരുവനന്തപുരം: ശിക്ഷാകാലാവധി കഴിഞ്ഞ വിദേശപൗരന്മാരെ താമസിപ്പിക്കാന്‍ തയാറാക്കുന്ന തടങ്കല്‍ പാളയങ്ങ (ഡിറ്റന്‍ഷന്‍ സെന്റര്‍)ളുടെ നടത്തിപ്പ് ചുമതല ഏറ്റെടുക്കാന്‍ ആളില്ല.

ഡിറ്റന്‍ഷന്‍ സെന്ററുകളുടെ നടത്തിപ്പ് സന്നദ്ധ സംഘടനകള്‍ക്ക് നല്‍കുന്നതിന് സര്‍ക്കാര്‍ ഉത്തരവ് പുറപ്പെടുവിച്ച് താല്‍പര്യപത്രം ക്ഷണിച്ചുവെങ്കിലും ഇതുവരെ ഒരു സംഘടനയും മുന്നോട്ടു വന്നിട്ടില്ല. നാളെയാണ് അപേക്ഷ നല്‍കാനുള്ള അവസാന തീയതി. കഴിഞ്ഞമാസം അപേക്ഷ ക്ഷണിച്ചുവെങ്കിലും ഒരു സംഘടന മാത്രമായിരുന്നു മുന്നോട്ടു വന്നത്. അതിനാല്‍ വീണ്ടും അപേക്ഷ ക്ഷണിച്ചെങ്കിലും തടങ്കല്‍ പാളയങ്ങളോടു സന്നദ്ധ സംഘടനകള്‍ മുഖംതിരിഞ്ഞു നില്‍ക്കുന്നത് സര്‍ക്കാരിന് തിരിച്ചടിയായിട്ടുണ്ട്. സാമൂഹ്യനീതി വകുപ്പിന്റെ അധീനതയിലുള്ള ഡിറ്റന്‍ഷന്‍ സെന്റര്‍ ഏറ്റെടുത്തു നടത്തുന്നതിന് സന്നദ്ധ സംഘടനകള്‍ക്ക് പ്രത്യേക മാനദണ്ഡമൊന്നും നിശ്ചയിച്ചിരുന്നില്ലെങ്കിലും ഒരു സംഘടനയും മുന്നോട്ടുവന്നിട്ടില്ലെന്നതും ശ്രദ്ധേയമാണ്.

അതേസമയം, സന്നദ്ധ സംഘടനയെ തെരഞ്ഞെടുക്കുന്നതിനുള്ള ചുമതല സാമൂഹ്യനീതി വകുപ്പിനല്ലെന്നും ആഭ്യന്തര- ജയില്‍ വകുപ്പുകളാണ് ഇക്കാര്യത്തില്‍ തീരുമാനമെടുക്കുന്നതെന്നും സാമൂഹ്യനീതി വകുപ്പ് ഡയറക്ടര്‍ ബിജു പ്രഭാകര്‍ പറഞ്ഞു.
ഹൈക്കോടതി ഉത്തരവിന്റെ അടിസ്ഥാനത്തിലാണ് സംസ്ഥാനത്ത് ഡിറ്റന്‍ഷന്‍ സെന്റര്‍ തുറക്കുന്നത്. കേന്ദ്രസര്‍ക്കാര്‍ മാനദണ്ഡ പ്രകാരമുള്ള താല്‍ക്കാലിക ഡിറ്റന്‍ഷന്‍ സെന്റര്‍ ആരംഭിക്കാന്‍ കഴിഞ്ഞ ഡിസംബറില്‍ ഹൈക്കോടതി ഉത്തരവിട്ടിരുന്നു. ഇതിന്റെ അടിസ്ഥാനത്തില്‍ തൃശൂരില്‍ വാടകവീട് എടുത്ത് താല്‍ക്കാലിക ഡിറ്റന്‍ഷന്‍ സെന്ററും തുറന്നു.

വിയ്യൂര്‍ ജയിലില്‍ ശിക്ഷ പൂര്‍ത്തിയാക്കി പുറത്തിറങ്ങാന്‍ കഴിയാതിരുന്ന രണ്ട് നൈജീരിയന്‍ സ്വദേശികളെയും ഒരു മ്യാന്‍മര്‍ സ്വദേശിയെയും അങ്ങോട്ട് മാറ്റി. നാല് പൊലിസുകാരെ ഇവിടെ സുരക്ഷക്കായും നിയോഗിച്ചു. എന്നാല്‍ നാല് മുറികള്‍ മാത്രമുള്ള ഈ വീട്ടില്‍ പൊലിസുകാരും തടവുകാരും ബുദ്ധിമുട്ടിയാണ് കഴിയുന്നത്. വിദേശ തടവുകാരുടെ ഭക്ഷണവും അവരുമായി ആശയവിനിമയം നടത്തുന്നതിനും പൊലിസുകാര്‍ക്ക് പ്രശ്‌നമാണ്.

അതിനിടെ പൂജപ്പുര സെന്‍ട്രല്‍ ജയിലില്‍ ശിക്ഷ പൂര്‍ത്തിയാക്കിയ രണ്ട് ശ്രീലങ്കന്‍ സ്വദേശികളെയും ഒരു കാമറൂണ്‍ സ്വദേശിയേയും ഡിറ്റന്‍ഷന്‍ സെന്ററിലേക്ക് മാറ്റാന്‍ നിര്‍ദേശിച്ചെങ്കിലും ഇവിടെ സ്ഥലമില്ലാത്തതിനാല്‍ വിയ്യൂര്‍ സെന്‍ട്രല്‍ ജയിലിലാണ് താല്‍ക്കാലികമായി പാര്‍പ്പിച്ചിരിക്കുന്നത്.

പണിപുരോഗമിക്കുന്ന ഡിറ്റന്‍ഷന്‍ സെന്ററിന്റെ പ്രവര്‍ത്തനം എത്രയും പെട്ടെന്ന് സന്നദ്ധസംഘടയെ ഏല്‍പ്പിക്കാനാണ് സര്‍ക്കാര്‍ അപേക്ഷ ക്ഷണിച്ചത്. അതിന് ആരെയും ലഭിക്കാത്തത് തിരിച്ചടിയായിരിക്കുകയാണ്.