പാലക്കാട്: വിക്ടോറിയ കോളജിന് സമീപം ദുരൂഹ സാഹചര്യത്തില്‍ കണ്ടെത്തിയ യുവാവ് അടിയേറ്റ് മരിച്ച കേസില്‍ പൊലീസുകാരനും അറസ്റ്റില്‍. പുതുപ്പള്ളിത്തെരുവ് സ്വദേശി അനസിന്റെ മരണത്തിലാണ് ഐ.ആര്‍.ബി സേനാംഗമായ റഫീഖിനെയും നോര്‍ത്ത് പൊലീസ് പ്രതി ചേര്‍ത്തത്. ചോദ്യം ചെയ്യലിലൂടെ റഫീഖിന്റെ പങ്ക് ബോധ്യപ്പെട്ടതോടെയാണ് റഫീക്കിനെ അറസ്റ്റ് ചെയ്തത്.

അനസിനെ ക്രിക്കറ്റ് ബാറ്റ് കൊണ്ട് അടിച്ച് വീഴ്ത്തിയതിന് ആദ്യം അറസ്റ്റിലായ ഫിറോസിന്റെ സഹോദരനാണ് റഫീഖ്.

ആദ്യം തര്‍ക്കമുണ്ടായ ശേഷം രണ്ടാമത് റഫീഖ് ഓടിച്ചിരുന്ന ബൈക്കിലെത്തിയാണ് ഫിറോസ് അനസിനെ ആക്രമിച്ചത്. ആക്രമണത്തിന് ശേഷം ഓട്ടോറിക്ഷയിടിച്ചാണ് അനസിന് പരുക്കേറ്റതെന്ന് വരുത്തിത്തീര്‍ക്കാന്‍ റഫീഖിന്റെ നേതൃത്വത്തില്‍ നീക്കമുണ്ടായെന്നാണ് അന്വേഷണസംഘത്തിന്റെ കണ്ടെത്തല്‍.

ഇരുവരും േചര്‍ന്നാണ് അപകടത്തില്‍ അനസിന് പരുക്കുണ്ടായെന്നറിയിച്ച് ജില്ലാ ആശുപത്രിയില്‍ പ്രവേശിപ്പിച്ചത്. അനസിന്റെ മരണത്തോടെയാണ് അപകടമെന്ന് പ്രചരിപ്പിച്ചത് ആക്രമണമെന്ന് തെളിഞ്ഞത്.

ലേഡീസ് ഹോസ്റ്റല്‍ പരിസരത്ത് മോശമായി പെരുമാറിയപ്പോഴാണ് ഇടപ്പെട്ടതെന്നും ബാറ്റ് കൊണ്ട് തലക്ക് അബദ്ധത്തില്‍ അടിച്ചെന്നും ഫിറോസ് പറഞ്ഞു.

നേരത്തെ റഫീഖും അനസിനെ മര്‍ദിച്ചതായുള്ള വിവരങ്ങളും നോര്‍ത്ത് പൊലീസ് ശേഖരിച്ചിട്ടുണ്ട്