ഡോ: വന്ദനയുടെ കൊലപാതകം; രൂക്ഷവിമര്‍ശനവുമായി ഹൈക്കോടതി

കൊച്ചി: കൊട്ടാരക്കര താലൂക്ക് ആശുപത്രിയില്‍ ഡ്യൂട്ടിക്കിടെ വനിതാ ഡോക്ടര്‍ കുത്തേറ്റ് മരിച്ച സംഭവത്തില്‍ വിമര്‍ശനവുമായി ഹൈക്കോടതി. എങ്ങനെ സുരക്ഷയൊരുക്കണമെന്ന കാര്യം കോടതിയല്ല പറഞ്ഞുതരേണ്ടത്. പൊലിസിന്റെ കൈയ്യില്‍ തോക്കുണ്ടായിരുന്നില്ലേ? ജനങ്ങളുടെ പ്രാഥമിക സുരക്ഷാ ചുമതല പൊലിസിനല്ലേയെന്നും കോടതി ചോദിച്ചു.

രാജ്യത്ത് എവിടെയും നടക്കാത്ത കാര്യങ്ങളാണ് നടക്കുന്നത്. ഡോക്ടര്‍മാരെ സംരക്ഷിക്കാന്‍ കഴിയില്ലെങ്കില്‍ ആശുപത്രികള്‍ അടച്ചുപൂട്ടുകയല്ലേ വേണ്ടതെന്നും കോടതി ചോദിച്ചു. ഡോക്ടറുടെ അടുത്ത് പ്രതിയെ ഒറ്റയ്ക്ക് നിര്‍ത്തണമെന്ന സര്‍ക്കാര്‍ ഉത്തരവ് ദുരന്തമാണ്. സംഭവത്തില്‍ പൊലിസ് മേധാവിയുടെ കോടതി വിശദീകരണം തേടി.

ഇതേ സംഭവം നാളെ മറ്റ് ആശുപത്രികളിലും നടക്കില്ലേയെന്ന് കോടതി ചോദിച്ചു. ഇത്തരം സംഭവങ്ങള്‍ ഭാവിയിലും പ്രതീക്ഷിക്കണം. സുരക്ഷ ഏര്‍പെടുത്തണമെന്നത് കോടതിയല്ല പറയേണ്ടത്. അത് സര്‍ക്കാര്‍ ചെയ്യേണ്ടതാണെന്നും കോടതി പറഞ്ഞു.