ന്യൂഡല്‍ഹി: സംസ്ഥാന പ്രസിഡന്റ് കെ. സുരേന്ദ്രനടക്കമുള്ളവരെ കുരുക്കിയ കുഴല്‍പ്പണ, കോഴ ആരോപണങ്ങള്‍ സംബന്ധിച്ച് പ്രധാനമന്ത്രി നരേന്ദ്ര മോദിക്ക് റിപ്പോര്‍ട്ട് നല്‍കിയതായി സ്ഥിരീകരിച്ച് വിരമിച്ച സിവില്‍ സര്‍വിസ് ഉദ്യോഗസ്ഥന്‍ സി.വി ആനന്ദബോസ്. കേരളത്തിലെ സംഘടനാ പ്രശ്‌നങ്ങള്‍ സംബന്ധിച്ച് റിപ്പോര്‍ട്ട് നല്‍കാന്‍ ആരെയും കേന്ദ്രനേതൃത്വം നിയോഗിച്ചിട്ടില്ലെന്നും ആരും റിപ്പോര്‍ട്ട് നല്‍കിയിട്ടില്ലെന്നും ബി.ജെ.പി ദേശീയ ജനറല്‍ സെക്രട്ടറി അരുണ്‍ സിങ് തിങ്കളാഴ്ച വൈകീട്ടോടെ പത്രക്കുറിപ്പ് പുറപ്പെടുവിച്ചിരുന്നു. ഇതു നിഷേധിക്കുന്നതാണ് ആനന്ദബോസിന്റെ പ്രതികരണം.

കേരളത്തിലെ ബി.ജെ.പിയിലെ പ്രശ്‌നങ്ങളെക്കുറിച്ച് പഠിക്കാന്‍ സി.വി ആനന്ദബോസ്, മുന്‍ ഡി.ജി.പി ജേക്കബ് തോമസ്, മെട്രോമാന്‍ ഇ. ശ്രീധരന്‍ എന്നിവരെ പ്രധാനമന്ത്രി നരേന്ദ്രമോദി നിയമിച്ചിരുന്നു. തെരഞ്ഞെടുപ്പ് ഫണ്ട് വിനിയോഗം ഉള്‍പ്പെടെ നേതാക്കാളുമായും സ്ഥാനാര്‍ഥികളുമായും പ്രവര്‍ത്തകരുമായും ചോദിച്ച് റിപ്പോര്‍ട്ട് തയാറാക്കാനായിരുന്നു നിര്‍ദേശം. എന്നാല്‍ ഇത്തരത്തില്‍ റിപ്പോര്‍ട്ട് ഇല്ലെന്നും തട്ടിപ്പാണെന്നുമായിരുന്നു കെ.സുരേന്ദ്രന്‍ പ്രതികരിച്ചത്. പിന്നാലെ തിങ്കളാഴ്ച കേന്ദ്രനേതൃത്വവും റിപ്പോര്‍ട്ട് നിഷേധിച്ചു. തെരഞ്ഞെടുപ്പില്‍ ബി.ജെ.പിയുടെ പ്രകടനം വിലയിരുത്താനായി പാര്‍ട്ടി സമിതിക്ക് രൂപംനല്‍കിയെന്ന വാര്‍ത്തകള്‍ പ്രചരിക്കുന്നുവെന്നും എന്നാല്‍ പാര്‍ട്ടി അത്തരത്തില്‍ ആരെയും നിയോഗിച്ചിട്ടില്ലെന്നും വ്യക്തമാക്കുകയാണെന്നും വിശകലനത്തിന് തങ്ങള്‍ക്ക് പ്രത്യേക സംവിധാനമുണ്ടെന്നുമായിരുന്നു അരുണ്‍ സിങ് ഇറക്കിയ വാര്‍ത്താകുറിപ്പില്‍ ഉണ്ടായിരുന്നത്. ഇതിനിടെയാണ് ആനന്ദബോസിന്റെ പ്രതികരണം.

ഉത്തരവാദിത്വപ്പെട്ടവര്‍ റിപ്പോര്‍ട്ട് ആവശ്യപ്പെട്ടെന്നും അതിന്റെ അടിസ്ഥാനത്തില്‍ റിപ്പോര്‍ട്ട് സമര്‍പ്പിച്ചെന്നും ആനന്ദബോസ് ഒരു ദേശീയ മാധ്യമത്തോടു പറഞ്ഞു. എന്നാല്‍, ആരാണ് 'ഉത്തരവാദിത്വപ്പെട്ടവര്‍' എന്ന് അദ്ദേഹം വ്യക്തമാക്കിയില്ല. അതേസമയം, പ്രധാനമന്ത്രി ആവശ്യപ്പെട്ടതിന്റെ അടിസ്ഥാനത്തിലാണ് റിപ്പോര്‍ട്ടെന്നും ബി.ജെ.പി കേന്ദനേതൃത്വം ഇക്കാര്യത്തില്‍ റിപ്പോര്‍ട്ട് ആവശ്യപ്പെട്ടിട്ടില്ലെന്നുമാണ് മുതിര്‍ന്ന നേതാവ് വിശദീകരിച്ചത്.