കോഴിക്കോട്: പാലോളി മുക്കില്‍ ഡി.വൈ.എഫ്.ഐ പ്രവര്‍ത്തകനെ അക്രമിച്ചത് ഞങ്ങളുടെ പ്രവര്‍ത്തകരല്ലെന്ന് എസ്.ഡി.പി.ഐ ജില്ലാ സെക്രട്ടറി പി.ടി അഹമ്മദ്. ജിഷ്ണുവിനെ പിടികൂടിയത് നാട്ടുകാരാണ്, ഇതില്‍ എസ്.ഡി.പി.ഐ പ്രവര്‍ത്തകരില്ല, നാട്ടുകാരുടെ കൂട്ടത്തില്‍ ഞങ്ങളുടെ ഒരു പ്രവര്‍ത്തകനുമുണ്ടായിരുന്നില്ലെന്നും പി.ടി അഹമ്മദ് പറഞ്ഞു. ഫ്‌ളക്‌സ് കീറിയ ശേഷം സി.പി.എമിന്റെ ആജ്ഞാനുവര്‍ത്തികളായി പോലീസ് പ്രവര്‍ത്തിക്കുകയാണെന്നും എസി.ഡി.പി.ഐ ആരോപിച്ചു. ആര്‍ക്കും പാര്‍ട്ടി കോടതി നടത്താന്‍ പാടില്ല, പക്ഷേ സി.പി എം പാര്‍ട്ടി കോടതി നടത്തിയിട്ടുണ്ട്. ജിഷ്ണുവിന്റെ അക്രമത്തെ ന്യായീകരിക്കുന്നില്ല, പിടിക്കപ്പെട്ടവര്‍ എസ്.ഡി.പി.ഐ യുടെ പ്രവര്‍ത്തകരല്ല, ഞങ്ങളുടെ ഒരു പ്രവര്‍ത്തകരും അതില്‍ ഉള്‍പെട്ടിട്ടില്ലെന്നും പി.ടി അഹമ്മദ് കോഴിക്കോട് നടത്തിയ പത്ര സമ്മേളനത്തില്‍ പറഞ്ഞു.

ബാലുശേരി പാലോളി മുക്കിലാണ് കഴിഞ്ഞ ദിവസം സംഭവമുണ്ടായത്. ആക്രമണത്തിനു പിന്നില്‍ എസ്.ഡി.പി.ഐ ലീഗ് പ്രവര്‍ത്തകരാണെന്നായിരുന്നു സി.പി.എം ആരോപിച്ചിരുന്നത്. മുപ്പതോളം പേര്‍ ചേര്‍ന്ന് മര്‍ദിച്ചെന്നാണ് ആരോപണം. ബലം പ്രയോഗിച്ച് കയ്യില്‍ വടിവാള്‍ പിടിപ്പിച്ചെന്നും ജിഷ്ണു പറഞ്ഞിരുന്നു.സംഭവത്തിലെ പരാതിക്കാരന്‍ ഡി.വൈ.എഫ്.ഐക്കാരനാണെന്നുവന്നതോടെ സി.പി.എമ്മും പ്രതിരോധത്തിലായിരിക്കുകയാണ്. എന്നാല്‍ നാജാഫ് ഡിവൈഎഫ്‌ഐ സജീവ പ്രവര്‍ത്തകന്‍ അല്ലെന്ന് ഡി.വൈ.എഫ്.ഐ സംസ്ഥാന പ്രസിഡന്റ് വസീഫ് പറയുന്നു. മൊഴി കൊടുത്ത സാഹചര്യം പരിശോധിക്കും. ആള്‍ക്കൂട്ട ആക്രമണമല്ല ബോധപൂര്‍വം ആളുകളെ വിളിച്ചുകൂട്ടിയുള്ള കലാപം ആയിരുന്നു നടന്നതെന്നും വസീഫ് സ്വകാര്യ ചാനലിനോട് പ്രതികരിച്ചിരുന്നു.