കോഴിക്കോട്: ഡി.വൈ.എഫ്.ഐ പ്രവര്‍ത്തകന്‍ ആള്‍ക്കൂട്ട മര്‍ദനത്തിനിരയായ സംഭവത്തില്‍ അഞ്ച് പേരുടെ അറസ്റ്റ് പൊലിസ് രേഖപ്പെടുത്തി. തൃക്കുറ്റിശ്ശേരിയിലെ ജിഷ്ണുവിനെ മര്‍ദിച്ച കേസിലാണ് ഡി.വൈ.എഫ്.ഐ പ്രവര്‍ത്തകന്‍ നജാഫ് ഫാരിസ് ഉള്‍പ്പടെ അഞ്ചുപേരുടെ അറസ്റ്റ് രേഖപ്പെടുത്തിയത്. മുഹമ്മദ് ഇജാസ്, മുഹമ്മദ് സാലി, റിയാസ്, തുടങ്ങി വിവിധ പാര്‍ട്ടികളിലുള്ളവരാണ് അറസ്റ്റിലായവര്‍. സംഭവത്തില്‍ 29 പേര്‍ക്കെതിരെ ബാലുശ്ശേരി പൊലിസ് ജാമ്യമില്ലാ കേസെടുത്തിട്ടുണ്ട്.

ഫ്‌ളക്‌സ് ബോര്‍ഡ് കീറിയെന്നാരോപിച്ചാണ് ജിഷ്ണുരാജിന് മര്‍ദ്ദനമേറ്റത്. ബാലുശേരി പാലോളി മുക്കിലാണ് സംഭവം. പിന്നില്‍ എസ്.ഡി.പി.ഐ പ്രവര്‍ത്തകരാണെന്നാണ് സി.പി.എം ആരോപിക്കുന്നത്. മുപ്പതോളം പേര്‍ ചേര്‍ന്ന് മര്‍ദിച്ചെന്നാണ് ആരോപണം. ബലം പ്രയോഗിച്ച് കയ്യില്‍ വടിവാള്‍ പിടിപ്പിച്ചെന്നും ജിഷ്ണു പറയുന്നു.

ഫളക്‌സ് ബോര്‍ഡ് കീറിയതുള്‍പ്പടെ അടുത്തിടെ പ്രദേശത്തുനടന്ന സംഭവങ്ങള്‍ക്ക് പിന്നിലെല്ലാം താന്‍ ആണെന്ന് നിര്‍ബന്ധിച്ച് പറയിച്ച് വീഡിയോ എടുത്തതായും ജിഷ്ണു പറയുന്നു.