ദുബായ്-ഡൽഹി ഫ്‌ളൈറ്റ് കോക്‌പിറ്റിൽ വനിതാ സുഹൃത്തിനെ കയറ്റിയ സംഭവത്തിൽ നടപടിയെടുത്ത് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ). സംഭവത്തിൽ, എയർ ഇന്ത്യയ്‌ക്ക് 3 മില്യൺ പിഴ ചുമത്തുകയും പൈലറ്റിനെ സസ്പെൻഡ് ചെയ്യുകയും ചെയ്തു. കോക്‌പിറ്റ് ലംഘനത്തിൽ വേഗത്തിലും കാര്യക്ഷമമായും നടപടിയെടുക്കാത്തതിനാണ് പിഴ. ഫെബ്രുവരി 27 ന് ദുബായ്-ഡൽഹി ഫ്‌ളൈറ്റിലാണ് സംഭവം.

ഫെബ്രുവരി 27 ന് എയർ ഇന്ത്യ എഐ-915 ഡൽഹി-ദുബായ് വിമാനത്തിന്റെ പൈലറ്റ് തന്റെ കാമുകിയെ കോക്ക്പിറ്റിലേക്ക് പ്രവേശിപ്പിക്കാൻ അനുവദിച്ചുവെന്ന് അതേ വിമാനത്തിലെ കാബിൻ ക്രൂ അംഗം നൽകിയ പരാതിയിൽ പറയുന്നു.

സംഭവം കൃത്യസമയത്ത് റിപ്പോർട്ട് ചെയ്യുന്നതിൽ പരാജയപ്പെട്ടതിന് എയർ ഇന്ത്യ സിഇഒ കാംബെൽ വിൽസൺ, ഫ്ലൈറ്റ് സേഫ്റ്റി ചീഫ് ഹെൻറി ഡോണോഹോ എന്നിവർക്ക് കഴിഞ്ഞ മാസം ഇന്ത്യയുടെ ഏവിയേഷൻ റെഗുലേറ്ററി ബോഡി ഡിജിസിഎ കാരണം കാണിക്കൽ നോട്ടീസ് അയച്ചിരുന്നു. മറുപടി നൽകാൻ 15 ദിവസത്തെ സമയം അനുവദിച്ചു.

ഡിജിസിഎ പറയുന്നതനുസരിച്ച്, എയർ ഇന്ത്യയുടെ സിഇഒയ്ക്ക് ഇത് സംബന്ധിച്ച് വിമാനത്തിലെ ഓപ്പറേറ്റിംഗ് ക്രൂ അംഗത്തിൽ നിന്ന് പരാതി ലഭിച്ചു. എന്നാൽ, ഇത് സുരക്ഷാ-സെൻസിറ്റീവ് ലംഘനമായിട്ടും സംഘടന ഉടനടി തിരുത്തൽ നടപടി സ്വീകരിച്ചില്ല. ഇതോടെ നടപടി വൈകുമെന്ന് മനസിലാക്കിയ പരാതിക്കാരൻ ഡിജിസിഎയെ സമീപിച്ചു.

ഏവിയേഷൻ റെഗുലേറ്റർ പരാതി ഗൗരവമായി എടുത്ത് അന്വേഷണം ആരംഭിച്ചു. അന്വേഷണത്തിൽ വിമാനക്കമ്പനിക്ക് 3 മില്യൺ രൂപ പിഴ ചുമത്താനും പൈലറ്റിന്റെ ലൈസൻസ് മൂന്ന് മാസത്തേക്ക് സസ്‌പെൻഡ് ചെയ്യാനും തീരുമാനമായി. നിയമലംഘനം തടയാൻ വേണ്ടത്ര ഉറച്ച നിലപാടെടുക്കാത്തതിന് സഹപൈലറ്റിനും മുന്നറിയിപ്പ് നൽകിയിട്ടുണ്ട്.

ഡിജിസിഎ സിഎആർ ( CAR - സിവിൽ ഏവിയേഷൻ റെഗുലേഷൻസ്), എയർ ഇന്ത്യ ഓപ്പറേഷൻസ് മാനുവൽ എന്നിവ പ്രകാരം, പ്രീഫ്ലൈറ്റ് ബിഎ ടെസ്റ്റിന് വിധേയരായ അംഗീകൃത വ്യക്തികൾക്ക് മാത്രമേ (നിയമപ്രകാരം ബാധകമായത്) കോക്ക്പിറ്റിൽ പ്രവേശിച്ച് അവിടെ ഇരിക്കാൻ കഴിയൂ. അതും പരിശോധനക്കോ വിമാനത്തിന്റെ സുരക്ഷയുമായോ ബന്ധപ്പെട്ടാണ്.