തിരുവനന്തപുരം: കെ.പി.സി.സി പ്രസിഡന്റായി കെ. സുധാകരന്‍ ചുമതലയേറ്റു. സുധാകരനൊപ്പം വര്‍ക്കിങ് പ്രസിഡന്റുമാരായി കൊടിക്കുന്നില്‍ സുരേഷ്, പി.ടി തോമസ്, ടി. സിദ്ദിഖ് എന്നിവരും സ്ഥാനമേറ്റെടുത്തു.
രാവിലെ കിഴക്കേക്കോട്ടയിലെ ഗാന്ധിപ്രതിമയിലും രക്തസാക്ഷി മണ്ഡപത്തിലും പുഷ്പാര്‍ച്ചന നടത്തിയ ശേഷമാണ് സുധാകരന്‍ കെ.പി.സി.സി ഓഫിസിലെത്തിയത്.

സുധാകരനെ മുന്‍മുഖ്യമന്ത്രി ഉമ്മന്‍ ചാണ്ടിയും സ്ഥാനമൊഴിഞ്ഞ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രനും ചേര്‍ന്ന് സ്വീകരിച്ചു. സേവാദള്‍ പ്രവര്‍ത്തകര്‍ സുധാകരന് ഗാര്‍ഡ് ഓഫ് ഹോണര്‍ നല്‍കി. കെ.പി.സി.സി ഓഫിസിന്റെ മുകളിലുള്ള ഹാളിലായിരുന്നു ചടങ്ങ്.
കോണ്‍ഗ്രസിനെ അധികാരത്തിലേക്ക് തിരിച്ചെത്തിക്കാന്‍ എല്ലാവരും ഒരുമിക്കണമെന്ന് സ്ഥാനമേറ്റെടുത്തുകൊണ്ട് സുധാകരന്‍ പറഞ്ഞു. അധികാരത്തിന്റെ പിറകെ പോകാതെ കര്‍മത്തിന്റെ പാതയില്‍ പോയാല്‍ കോണ്‍ഗ്രസിനെ ശക്തമായി തിരികെ കൊണ്ടുവരാന്‍ സാധിക്കും. തന്റെ പ്രവര്‍ത്തനരാഹിത്യംകൊണ്ടോ കഴിവുകേടുകൊണ്ടോ പാര്‍ട്ടിക്ക് ഒരു ക്ഷീണവും സംഭവിക്കില്ലെന്ന് പ്രവര്‍ത്തകര്‍ക്ക് ഉറപ്പുനല്‍കുന്നു.
ആര്‍.എസ്.എസ് ലേബലൊട്ടിച്ച് തന്നെ തകര്‍ത്തുകളയാമെന്ന് സി.പി.എം കരുതേണ്ട. മുമ്പും ഇത്തരം ആരോപണങ്ങള്‍ സി.പി.എം ഉന്നയിച്ചെങ്കിലും അത് ഏശാതെപോകുകയായിരുന്നു. ഇതും ജനങ്ങള്‍ വിശ്വസിക്കില്ല. സി.പി.എമ്മിന് തന്നെ ഭയമാണ്. അതിനാലാണ് വര്‍ഗീയവാദിയായി ചിത്രീകരിക്കുന്നതെന്നും സുധാകരന്‍ പറഞ്ഞു.

സാമൂഹിക പ്രവര്‍ത്തനവും ജീവകാരുണ്യ പ്രവര്‍ത്തനവും കോര്‍ത്തിണക്കിയ പുതിയ രാഷ്ട്രീയ പ്രവര്‍ത്തന ശൈലി രൂപപ്പെടണമെന്ന് ചടങ്ങില്‍ സംസാരിച്ച പ്രതിപക്ഷ നേതാവ് വി.ഡി സതീശന്‍ പറഞ്ഞു.
കോണ്‍ഗ്രസ് ഒരു ആള്‍ക്കൂട്ടമാണെന്ന തെറ്റായ നിര്‍വചനം തിരുത്തണം. ചിട്ടയായ പ്രവര്‍ത്തനത്തോടെ സംഘടനയുടെ അടിത്തറ ഭദ്രമാക്കണമെന്നും സതീശന്‍ പറഞ്ഞു.

പ്രസിഡന്റ് പദവി കടുത്ത വെല്ലുവിളിയായിരുന്നെന്നും ആഭ്യന്തര ജനാധിപത്യം ഉറപ്പുവരുത്താതെ ലക്ഷ്യത്തിലെത്താന്‍ കഴിയില്ലെന്നും വിടവാങ്ങല്‍ പ്രസംഗത്തില്‍ മുല്ലപ്പള്ളി പറഞ്ഞു. ന്യൂനപക്ഷങ്ങളെ കോണ്‍ഗ്രസിലേക്ക് മടക്കിക്കൊണ്ടുവരണം. മതനിരപേക്ഷത സംരക്ഷിക്കാന്‍ കോണ്‍ഗ്രസിനു പകരം മറ്റൊരു പ്രസ്ഥാനമില്ലെന്ന് ന്യൂനപക്ഷങ്ങള്‍ തിരിച്ചറിയണമെന്നും അദ്ദേഹം പറഞ്ഞു. എ.ഐ.സി.സി ജനറല്‍ സെക്രട്ടറി താരിഖ് അന്‍വര്‍, ഉമ്മന്‍ ചാണ്ടി, രമേശ് ചെന്നിത്തല തുടങ്ങിയവരും സംസാരിച്ചു.