കോഴിക്കോട്
എസ്.എസ്.എൽ.സി പഠനം പൂർത്തിയാക്കുന്ന മലബാറിലെ വിദ്യാർഥികൾ വർഷങ്ങളായി അനുഭവിക്കുന്ന പ്ലസ് വൺ സീറ്റ് ക്ഷാമത്തിന് ശാശ്വത പരിഹാരം ഉണ്ടാക്കണമെന്ന് എസ്.കെ.എസ്.എസ്.എഫ് സംസ്ഥാന സെക്രട്ടറിയേറ്റ് ആവശ്യപ്പെട്ടു.
ഓരോവർഷവും സമരങ്ങളും പ്രതിഷേധങ്ങളും ഉണ്ടാകുമ്പോൾ നിലവിലുള്ള ബാച്ചുകളിൽ നാലോ അഞ്ചോ സീറ്റ് വർധിപ്പിച്ച് ഒഴിഞ്ഞുമാറുന്നരീതി സർക്കാർ അവസാനിപ്പിക്കണം. സ്‌കൂളുകളിൽ ആവശ്യമായ പുതിയ ബാച്ചുകൾ അനുവദിക്കുക മാത്രമാണ് യഥാർഥ പരിഹാരം.
ഓരോ വർഷവും പരീക്ഷയെഴുതി വിജയിക്കുന്ന വിദ്യാർഥികളുടെ എണ്ണത്തിന് ആനുപാതികമായി എല്ലാ ജില്ലകളിലും ഉപരിപഠന സൗകര്യമുണ്ടെന്ന് ഉറപ്പുവരുത്താൻ സർക്കാരിന് സാധിക്കണമെന്നും യോഗം ആവശ്യപ്പെട്ടു.
ഈ ആവശ്യങ്ങളുന്നയിച്ച് മലബാറിലെ കലക്ടറേറ്റുകൾക്ക് മുന്നിൽ നാളെ രാവിലെ 10ന് എസ്.കെ.എസ്.എസ്.എഫ് ധർണ നടത്തും.
കാസർകോഡ്, കണ്ണൂർ, വയനാട്, കോഴിക്കോട്, മലപ്പുറം, പാലക്കാട് ജില്ലകളിലാണ് ധർണ സംഘടിപ്പിക്കുക. പരിപാടിയുടെ വിജയത്തിനായി മുഴുവൻ പ്രവർത്തകരും രംഗത്തിറങ്ങണമെന്ന് പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങളും ജന.സെക്രട്ടറി റശീദ് ഫൈസി വെള്ളായിക്കോടും അഭ്യർഥിച്ചു.