കൊച്ചി
നടിയെ അക്രമിച്ച കേസില്‍ കോടതിയുടെ കസ്റ്റഡിയിലിരിക്കുന്ന മെമ്മറി കാര്‍ഡിന്റെ ഉത്തരവാദിത്വം കോടതിക്ക് തന്നെയെന്ന് ഹൈക്കോടതി. മെമ്മറി കാര്‍ഡിലെ ഹാഷ് വാല്യു മാറിയതിനാല്‍ പരിശോധനക്കയക്കണമെന്ന പ്രോസിക്യൂഷന്‍ ഹരജിയിലെ വാദത്തിനിടെയാണ് ജസ്റ്റിസ് ബച്ചുകുര്യന്‍ തോമസ് ഇക്കാര്യം ചൂണ്ടിക്കാട്ടിയത്.
അതില്‍ പ്രോസിക്യൂഷന്‍ ആരോപണമുന്നയിക്കരുതെന്നും കോടതി ഓര്‍മിപ്പിച്ചു.എന്നാല്‍ പ്രോസിക്യൂഷന്‍ അത്തരം കാര്യങ്ങളിലേക്ക് കടക്കുന്നില്ലെന്നും മെമ്മറി കാര്‍ഡ് പരിശോധിക്കണമെന്നതാണ് ആവശ്യമെന്നും ഡയരക്ടര്‍ ജനറല്‍ ഓഫ് പ്രോസിക്യൂഷന്‍ കോടതിയെ അറിയിച്ചു.

നടിയെ അക്രമിച്ച കേസിലെ മെമ്മറി കാര്‍ഡിലെ ഹാഷ്‌വാല്യു മാറിയെന്ന് പറയുന്നതെങ്ങനെയെന്ന് വ്യക്തമാക്കണമെന്ന് ഹൈക്കോടതി പറഞ്ഞു. മെമ്മറി കാര്‍ഡിലെ ഹാഷ് വാല്യു മാറിയെന്ന് വ്യക്തമായിട്ടുണ്ടെങ്കിലും വിഡിയോ ഫയലുകളിലെ ഹാഷ്‌വാല്യു മാറിയിട്ടില്ലല്ലോയെന്നായിരുന്നു കോടതിയുടെ ചോദ്യം.എന്നാല്‍ കോടതിയും അന്വേഷണ ഉദ്യോഗസ്ഥരും വിഷയത്തില്‍ വിദഗ്ധരല്ലാത്തതിനാല്‍ വിദഗ്ധര്‍ക്ക് മാത്രമേ ഇക്കാര്യം മനസിലാക്കാന്‍ കഴിയുവെന്നാണ് ഡി.ജി.പി ഇതിന് മറുപടി നല്‍കിയത്.അതിനാല്‍ മെമ്മറി കാര്‍ഡ് ലാബിലയച്ച് പരിശോധിക്കണമെന്നും പ്രോസിക്യൂഷന്‍ കോടതിയെ അറിയിച്ചു.ഇന്ന് രാവിലെ വീണ്ടും ഹരജി പരിഗണിക്കാമെന്ന് കോടതി നിര്‍ദേശിച്ചെങ്കിലും സീനിയര്‍ അഭിഭാഷകന്‍ ഹാജരാകാന്‍ സമയം അനുവദിക്കണമെന്ന് നടി ആവശ്യപ്പെട്ടതിനെ തുടര്‍ന്ന് വെള്ളിയാഴ്ച ഉച്ചയ്ക്ക് വീണ്ടും പരിഗണിക്കാന്‍ മാറ്റി.മെമ്മറി കാര്‍ഡ് ഫൊറന്‍സിക് പരിശോധനയ്ക്ക് വീണ്ടും അയക്കുന്നതിന് നടന്‍ ദിലീപ് എതിര്‍പ്പറിയിച്ചിരുന്നു. അനാവശ്യ കാലതാമസം മാത്രമാണ് ഇതുണ്ടാക്കുകയെന്നാണ് ദിലീപിന്റെ വാദം.