ആനക്കര: രണ്ടു വൃക്കകളും പ്രവര്‍ത്തനരഹിതമായി മാസങ്ങളോളം ദുരിതമനുഭവിക്കുന്ന കൂടല്ലൂര്‍ പുളിക്കപറമ്പില്‍  ഭാസ്‌കരന് കാരുണ്യ സ്പര്‍ശവുമായി കുമ്പിടി ജി.ടി.ജെ.ബി സ്‌കൂളിലെ കുട്ടികള്‍. കുടുംബത്തിന്റെ ഏക ആശ്രയമായ യുവാവിനു വേണ്ടി കുമ്പിടി പ്രൈമറി സ്‌കൂളിലെ കുട്ടികള്‍ സമാഹരിച്ച തുക സ്‌കൂള്‍ അസംബ്ലിയില്‍ സ്‌കൂള്‍ ലീഡര്‍ കെ. സൂര്യയും ആനക്കര ഗ്രാമപഞ്ചായത്ത്  വൈസ് പ്രസിഡന്റ് പി. വേണു ഗോപാലനും ചേര്‍ന്ന് ചികിത്സാ സഹായനിധി ചെയര്‍മാന്‍ ഇ. പരമേശ്വരന്‍കുട്ടിക്ക് കൈമാറി.
ചടങ്ങില്‍ പി.ടി.എ പ്രസിഡന്റ് കെ.പി ശശീധരന്‍ അധ്യക്ഷനായി. സഹായനിധി കണ്‍വീനര്‍ ആരിഫ് നാലകത്ത്, എസ്.എസ്.ജി ചെയര്‍മാന്‍  ഒ.പി ചന്ദ്രശേഖരന്‍, സ്‌കൂള്‍ വികസന സമിതി കണ്‍വീനര്‍ കെ.വി ഹരിഗോവിന്ദ്, പി.ടി.എ അംഗങ്ങള്‍ എന്നിവര്‍ ചടങ്ങില്‍ സംബന്ധിച്ചു.  പ്രധാനധ്യാപകന്‍ പി.ടി രവീന്ദ്രനാഥന്‍ സ്വാഗതവും സ്റ്റാഫ് സെക്രട്ടറി എസ്.ആര്‍ ശോഭ നന്ദിയും പറഞ്ഞു.