കൊല്ലങ്കോട്: അതിര്‍ത്തി പ്രദേശമായ ഗോവിന്ദാപുരത്ത് ബസ് സ്റ്റാന്‍ഡെന്ന വര്‍ഷങ്ങള്‍ പഴക്കമുള്ള ആവശ്യം യാഥാര്‍ഥ്യമാകുന്നു.  2008-09 സാമ്പത്തിക വര്‍ഷത്തില്‍ കൊല്ലങ്കോട് ബ്ലോക്ക് പഞ്ചായത്ത് സ്ഥലമെടുത്ത് നിര്‍മിച്ച കംഫര്‍ട്ട് സ്റ്റേഷന്‍ ഉള്‍പ്പെടെയുള്ള രണ്ടര ഏക്കര്‍ സ്ഥലത്താണ് ബസ് സ്റ്റാന്‍ഡ് നിര്‍മിക്കാന്‍ കൊല്ലങ്കോട് പഞ്ചായത്ത് തീരുമാനിച്ചിരിക്കുന്നത്. ദീര്‍ഘദൂര സര്‍വിസ് നടത്തുന്നതും അന്തര്‍സംസ്ഥാന സര്‍വിസ് നടത്തുന്ന ബസുകളിലെ യാത്രക്കാര്‍ക്കും ചെക്ക്‌പോസ്റ്റിലെ പരിശോധനയ്ക്കായി നിര്‍ത്തുന്ന ടൂറിസ്റ്റ് വാഹനത്തിലെ യാത്രക്കാര്‍ക്കും ഏറെ പ്രയോജനം ലഭിക്കുന്നതാണ് ഗോവിന്ദാപുരം ബസ് സ്റ്റാന്‍ഡ്. അതിര്‍ത്തി ചെക്ക്‌പോസ്റ്റില്‍ പരിശോധനയ്‌ക്കെത്തുന്ന വാഹനങ്ങളുടെ നീണ്ടനിരയും വാഹനം തിരിക്കേണ്ട സ്ഥലക്കുറവുമാണ് കേരള അതിര്‍ത്തിയിലെ പ്രധാന പ്രശ്‌നം.
 ഇതിനു പരിഹാരമായാണ് രണ്ടര ഏക്കര്‍ സ്ഥലം ഏറ്റെടുത്തിരുന്നത്. പഞ്ചായത്ത് ഫണ്ടിനു പുറമെ പ്രാദേശിക വികസന ഫണ്ടുകള്‍ വിനിയോഗിച്ച് ഗോവിന്ദാപുരത്ത് അതിര്‍ത്തി പ്രദേശത്തിന്റെ മുഖച്ഛായ മാറ്റുന്ന നവീന രീതിയില്‍ നിര്‍മാണ പ്രവര്‍ത്തനങ്ങള്‍ ഉടന്‍ ഉണ്ടാകുമെന്നാണ് അറിയുന്നത്.