ചെന്നൈ: മലേഷ്യക്കാരിയായ തമിഴ് നടിയെ ബലാത്സംഗം ചെയ്ത കേസില്‍ തമിഴ്‌നാട് മുന്‍ മന്ത്രിയും എ.ഐ.എ.ഡി.എം.കെ നേതാവുമായ എം. മണികണ്ഠനെ ചെന്നൈ പൊലിസ് ബംഗളൂരുവില്‍ അറസ്റ്റ് ചെയ്തു.
മണികണ്ഠന്‍ വിവാഹവാഗ്ദാനം നല്‍കി പീഡിപ്പിക്കുകയും നിര്‍ബന്ധിച്ച് ഗര്‍ഭഛിദ്രം നടത്തുകയും കൊല്ലുമെന്ന് ഭീഷണിപ്പെടുത്തുകയും ചെയ്‌തെന്നാണ് 36കാരിയായ നടിയുടെ പരാതി.

കേസില്‍ മുന്‍കൂര്‍ജാമ്യം തേടി മണികണ്ഠന്‍ മദ്രാസ് ഹൈക്കോടതിയെ സമീപിച്ചിരുന്നെങ്കിലും ജാമ്യാപേക്ഷ കോടതി തള്ളി. പിന്നാലെ പ്രതി ഒളിവില്‍ പോകുകയായിരുന്നു. 2019വരെ തമിഴ്‌നാട് ഐ.ടി മന്ത്രിയായിരുന്നു മണികണ്ഠന്‍. ഇയാള്‍ക്കെതിരേ ബലാത്സംഗം, നിര്‍ബന്ധിച്ച് ഗര്‍ഭം അലസിപ്പിക്കല്‍, വഞ്ചന തുടങ്ങി ആറു വകുപ്പുകള്‍ ചുമത്തിയിട്ടുണ്ട്.

മെയ് 28നാണ് യുവതി ചെന്നൈ പൊലിസില്‍ പരാതി നല്‍കിയത്. തന്നെ മര്‍ദിച്ചതായും സ്വകാര്യ ചിത്രങ്ങളും വിഡിയോകളും പുറത്തുവിടുമെന്ന് ഭീഷണിപ്പെടുത്തിയതായും പരാതിയിലുണ്ട്.