കോഴിക്കോട്: രാമനാട്ടുകരക്കടുത്ത് പുളിഞ്ചോടില്‍ ഉണ്ടായ വാഹനാപകടത്തില്‍ അഞ്ചു പേര്‍ മരിച്ചു. ബൊലേറോയും സിമന്റ് ലോറിയും കൂട്ടിയിടിച്ചാണ് അപകടം. പാലക്കാട് ചെര്‍പ്പുളശ്ശേരി സ്വദേശികളായ മുഹമ്മദ് സാഹിര്‍, നാസര്‍, സുബൈര്‍, അസൈനാര്‍, താഹിര്‍ ഇവരാണ് മരിച്ചത്. ബൊലേറോയിലുണ്ടായിരുന്ന അഞ്ചു പേരും സംഭവ സ്ഥലത്ത് വെച്ച് തന്നെ മരിച്ചു. കരിപ്പൂര്‍ വിമാനത്താവളത്തില്‍ പോയി മടങ്ങി വരുമ്പോഴായിരുന്നു അപകടം.

ഇന്ന് പുലര്‍ച്ച 5:00 മണിയോടെയാണ് അപകടമുണ്ടായത്. ഒറ്റപ്പാലം രജിസ്ട്രേഷനിലുള്ളതാണ് അപകടത്തില്‍ പെട്ട വാഹനം. നാട്ടുകാരും പൊലിസും ഫയര്‍ഫോഴ്സുമെത്തി മൃതദേഹങ്ങള്‍ കോഴിക്കോട് മെഡിക്കല്‍ കോളേജിലേക്ക് മാറ്റി.

അപകട സമയത്ത് പ്രദേശത്ത് കനത്ത മഴയുണ്ടായിരുന്നു. അപകടത്തില്‍ കാറ് പൂര്‍ണ്ണമായും തകര്‍ന്നു.