കോഴിക്കോട്: ഇന്ന് പുലര്‍ച്ചെ രാമനാട്ടുകരയില്‍ വാഹനാപകടത്തില്‍ അഞ്ചുപേര്‍ മരിച്ച സംഭവത്തില്‍ ദുരൂഹത സംശയിക്കുന്നതായി പൊലിസ്. കരിപ്പൂര്‍ വിമാനത്താവളത്തിലേക്ക് സുഹൃത്തിനെ വിടാന്‍ പോവുകയായിരുന്നു കാറിലുണ്ടായിരുന്നവര്‍ എന്നാണ് സുഹൃത്തുക്കള്‍ പറഞ്ഞത്. ചെറുപ്പുളശ്ശേരിയില്‍ നിന്ന് കരിപ്പൂരിലേക്കുള്ള വഴിയില്‍ അല്ല അപകടം ഉണ്ടായത്. കാറിലുണ്ടായിരുന്നവര്‍ രാമനാട്ടുകര അപടകടം നടന്ന സ്ഥലം വഴി പോയ സാഹചര്യം പൊലിസ് അന്വേഷിക്കും. വഴി തെറ്റിപ്പോയതാണോ വേറെ എന്തെങ്കിലും ദുരൂഹതയുണ്ടോ എന്നെല്ലാം പൊലിസ് അന്വേഷിക്കുന്നുണ്ട്

അപകടത്തില്‍പെട്ട കാറിനൊപ്പമുണ്ടായിരുന്ന രണ്ട് വാഹനങ്ങളിലുണ്ടായിരുന്ന ആറ് പേരുടെ മൊഴിയെടുക്കുന്നു. എയര്‍പോര്‍ട്ട് റോഡിലെ സിസിടിവി ദൃശ്യങ്ങള്‍ പൊലിസ് പരിശോധിക്കുന്നുണ്ട്. കൊണ്ടോട്ടി പൊലിസും കോഴിക്കോട് സിറ്റി പൊലിസ് കമ്മിഷണറും ഫറോക്ക് സ്റ്റേഷനിലെത്തിയിട്ടുണ്ട്.

സംഭവവുമായി ബന്ധപ്പെട്ട കൂടുതല്‍ കാര്യങ്ങള്‍ പൊലിസ് അന്വേഷിച്ചുവരികയാണ്. ഇന്ന് പുലര്‍ച്ചെ നാലരയോടെയാണ് രാമനാട്ടുകര പുളിഞ്ചോടിനടുത്ത് കാറും ലോറിയും കൂട്ടിയിടിച്ച് കാറിലുണ്ടായിരുന്ന അഞ്ച് പേര്‍ മരിച്ചത്. പാലക്കാട് ചെര്‍പ്പുളശേരി സ്വദേശികളായ മുഹമ്മദ് സാഹിര്‍, നാസര്‍, സുബൈര്‍, ഹസൈനര്‍, താഹിര്‍ എന്നിവരാണ് മരിച്ചത്. അപകടത്തില്‍ കാര്‍ പൂര്‍ണമായും തകര്‍ന്നു