തിരുവനന്തപുരം
എ.കെ.ജി സെന്റർ ആക്രമത്തിനു പിന്നാലെ ഓഫിസ് സന്ദർശിച്ചെന്നുള്ള എസ്.ഡി.പി.ഐ ജില്ലാ നേതാക്കളുടെ ചിത്രത്തിന് മറുപടിയുമായി സി.പി.എം രംഗത്ത്.
വെള്ളിയാഴ്ച വൈകിട്ടാണ് എസ്.ഡി.പി.ഐ ഭാരവാഹികളെന്ന് പരിചയപ്പെടുത്തി സംഘം എ.കെ.ജി സെന്ററിലെത്തിയത്.
പാർട്ടി നേതാക്കൻമാരെ കാണണമെന്ന് ആവശ്യപ്പെട്ടെങ്കിലും കൂടിക്കാഴ്ച നടത്താൻ പാർട്ടിക്ക് താൽപര്യമില്ലെന്നറിയിച്ച് മടക്കിവിടുകയാണ് ചെയ്തത്. എന്നാൽ പുറത്തിറങ്ങിയ ഇവർ എ.കെ.ജി സെന്ററിന് മുന്നിൽനിന്ന് ഫോട്ടോ എടുത്ത് സമൂഹമാധ്യമങ്ങളിൽ പ്രചരിപ്പിക്കുകയാണ് ഉണ്ടായതെന്നും പ്രസ്താവനയിൽ വ്യക്തമാക്കി.

എ.കെ.ജി സെന്റർ പൊതുജനങ്ങൾക്ക് പ്രവേശനമുള്ള സ്ഥലമാണ്. കടന്നുവരുന്നതിന് ഒരു വിലക്കും ആർക്കും ഏർപ്പെടുത്തിയിട്ടില്ല.
എന്നാൽ എസ്.ഡി.പി.ഐ പോലുള്ള വർഗീയ കക്ഷികളുമായി ഒരു തരത്തിലുള്ള കൂടിക്കാഴ്ചയും പാർട്ടി ആഗ്രഹിക്കുന്നില്ല എന്നതിന്റെ അടിസ്ഥാനത്തിലാണ് അവരെ മടക്കി അയച്ചതെന്നും സി.പി.എം വ്യക്തമാക്കി.

എ.കെ.ജി സെന്റർ ആക്രമത്തിനുപിന്നാലെ ഓഫിസ് സന്ദർശിച്ചെന്നുള്ള ചിത്രം എസ്.ഡി.പി.ഐ ജില്ലാ നേതാക്കൾ കഴിഞ്ഞ ദിവസം ഫേസ്ബുക്കിൽ പോസ്റ്റ് ചെയ്തിരുന്നു.
എ.കെ.ജി സെന്ററിൽനിന്ന് നേതാക്കൾ ഇറങ്ങി വരുന്നതും, അക്രമം നടന്ന സ്ഥലം പരിശോധിക്കുന്നതും, പൊലിസിനോട് കാര്യങ്ങൾ ചോദിച്ചറിയുന്ന ചിത്രവുമാണ് എസ്.ഡി.പി.ഐ നേതാക്കൾ പങ്കുവെച്ചത്.
എസ്.ഡി.പി.ഐ ജില്ലാ ജനറൽ സെക്രട്ടറി, വൈസ് പ്രസിന്റ്, സെക്രട്ടറി, ട്രഷറർ, പ്രാദേശിക നേതക്കളുമടക്കം ഏഴു പേരാണ് ഓഫിസ് സന്ദർശിക്കാനെത്തിയിരുന്നത്.