സാവോപോളോ: കോപ്പ അമേരിക്കയില്‍ തുടര്‍ച്ചയായ മൂന്നാം ജയവുമായി ബ്രസീല്‍ ക്വാര്‍ട്ടറില്‍. കൊളംബിയയെ ഒന്നിനെതിരെ രണ്ട് ഗോളുകള്‍ക്കാണ് തോല്‍പ്പിച്ചത്. ഇഞ്ചുറി ടൈമില്‍ കസെമിറോ നേടിയ ഗോളിലാണ് ബ്രസീലിന്റെ ജയം. പകരക്കാരന്‍ താരം റോബര്‍ട്ടോ ഫിര്‍മിനോ (78), കാസിമീറോ (90+10) എന്നിവരാണ് ബ്രസീലിനായി ഗോളുകള്‍ നേടിയത്. കൊളംബിയയുടെ ഏക ഗോള്‍ ലൂയിസ് ഡയസ് നേടി.

തുടര്‍ച്ചയായ മൂന്നാം ജയത്തോടെ ഒന്‍പതു പോയിന്റുമായി ബ്രസീല്‍ ഗ്രൂപ്പ് ബിയില്‍ ഒന്നാം സ്ഥാനം നിലനിര്‍ത്തി. നാലു മത്സരങ്ങളില്‍നിന്ന് രണ്ടാം തോല്‍വി വഴങ്ങിയ കൊളംബിയ നാലു പോയിന്റുമായി രണ്ടാം സ്ഥാനത്തുണ്ട്.

മത്സരം സമനിലയില്‍ അവസാനിക്കുമെന്ന് ഉറപ്പിച്ചിരിക്കെയായിരുന്നു അപ്രതീക്ഷിതമായി ബ്രസീലിന്റെ വിജയഗോള്‍ പിറന്നത്. നെയ്മറുടെ കോര്‍ണര്‍ വലയിലെത്തിച്ച് കാസെമിറോ ബ്രസീലിന് വിജയം സമ്മാനിക്കുയായിരുന്നു.