സ്വന്തം ലേഖകന്‍
കോഴിക്കോട്: മുസ്‌ലിം ലീഗ് നേതൃത്വത്തിനെതിരേ യൂത്ത് ലീഗ് സംസ്ഥാന ഭാരവാഹികളുടെ യോഗത്തില്‍ രൂക്ഷ വിമര്‍ശനം. നേതാക്കള്‍ക്ക് ചുറ്റും ഉപജാപകസംഘങ്ങള്‍ പ്രവര്‍ത്തിക്കുന്നതായും നാലോ അഞ്ചോ പേരുടെ അധികാര വീതംവയ്പ്പിന്റെ കേന്ദ്രമായി പാര്‍ട്ടി ഉന്നതാധികാര സമിതി മാറിയതായും വിമര്‍ശനമുയര്‍ന്നു.

ആശയപരമായ ചര്‍ച്ചകളുടെ വാതില്‍ നേതാക്കള്‍ കൊട്ടിയടച്ചു. പകരം നടക്കുന്നത് ഗൂഢാലോചനയാണ്. ഉപജാപകസംഘങ്ങളും ആജ്ഞാനുവര്‍ത്തികളായ ജില്ലാ നേതാക്കളും പാര്‍ട്ടിയെ പരാജയത്തിലേക്ക് തള്ളിവിട്ടെന്നും ചില ഭാരവാഹികള്‍ അഭിപ്രായപ്പെട്ടു.പാര്‍ട്ടി ഘടകങ്ങളില്‍ ചര്‍ച്ച ചെയ്യാതെയാണ് പി.കെ കുഞ്ഞാലിക്കുട്ടി എം.പി സ്ഥാനം രാജിവച്ച് നിയമസഭാ തെരഞ്ഞെടുപ്പില്‍ മത്സരിച്ചത്. ഇതു തിരിച്ചടിയായി.

അധികാരത്തിനായി നേതാക്കള്‍ നടത്തിയ നെട്ടോട്ടം പാര്‍ട്ടിയെ അപഹാസ്യമാക്കിയെന്ന് സംസ്ഥാന വൈസ് പ്രസിഡന്റുമാരിലൊരാള്‍ പറഞ്ഞു. പാര്‍ട്ടി ഉന്നതാധികാര സമിതിയെ ഭൂരിഭാഗം ഭാരവാഹികളും ചോദ്യം ചെയ്തു. ഭരണഘടനാപരമല്ലാത്ത ഈ സമിതി എടുക്കുന്ന തീരുമാനങ്ങള്‍ പാര്‍ട്ടിയെ പ്രതിസന്ധിയാക്കുന്നതാണെന്ന് വിമര്‍ശനമുയര്‍ന്നു. ഇതിനെ ചോദ്യം ചെയ്യുന്നവരെ തളര്‍ത്താന്‍ അധാര്‍മികമായ ഇടപെടലും സ്വാധീനവും നടത്തുന്നു.
കെ.എം ഷാജി ചാനല്‍ അഭിമുഖത്തില്‍ ഉന്നയിച്ച വിമര്‍ശനങ്ങള്‍ പലതും ശരിയാണെങ്കിലും പാര്‍ട്ടി വേദിയിലായിരുന്നു അതു പറയേണ്ടിയിരുന്നത്. അഖിലേന്ത്യാ ജനറല്‍ സെക്രട്ടറിക്ക് ന്യൂനപക്ഷ വിഷയങ്ങള്‍ കൈകാര്യം ചെയ്യാനായില്ല. ഡല്‍ഹിയില്‍ പാര്‍ട്ടിക്ക് ഓഫിസുണ്ടാക്കുമെന്ന് പറഞ്ഞവര്‍ കോഴിക്കോട്ടെ ലീഗ് ഹൗസ് മിനുക്കി നടക്കുകയാണെന്നും വിമര്‍ശനമുണ്ടായി.

പുതിയ തലമുറയ്ക്ക് പ്രതീക്ഷ നല്‍കുന്ന ഒരു പദ്ധതിയും പാര്‍ട്ടിയില്‍ നിന്നുണ്ടാകുന്നില്ല. പാര്‍ലമെന്റ് തെരഞ്ഞെടുപ്പില്‍ എസ്.ഡി.പി.ഐയുമായി നടത്തിയ ചര്‍ച്ചയും തദ്ദേശ സ്വയംഭരണ തെരഞ്ഞെടുപ്പില്‍ വെല്‍ഫെയര്‍ പാര്‍ട്ടിയുമായി ഉണ്ടാക്കിയ സഖ്യവും പൊതുസമൂഹത്തോട് നേതാക്കള്‍ ചെയ്ത കുറ്റകൃത്യമാണെന്നും ഭാരവാഹികള്‍ അഭിപ്രായപ്പെട്ടു.

ചൊവ്വാഴ്ച വൈകീട്ട് തുടങ്ങിയ ഭാരവാഹി യോഗം രാത്രി ഒരുമണി വരെ നീണ്ടു. ഇന്നലെ നടന്ന സംസ്ഥാന പ്രവര്‍ത്തകസമിതി യോഗത്തിലും ലീഗ് നേതൃത്വത്തിനെതിരേ വിമര്‍ശനമുയര്‍ന്നു. ഈ മാസം നടക്കുന്ന സംസ്ഥാന കമ്മിറ്റി തെരഞ്ഞെടുപ്പിന്റെ ഒരുക്കങ്ങള്‍ യോഗം വിലയിരുത്തി.