സ്വന്തം ലേഖിക
കൊച്ചി
മുൻമന്ത്രി കെ.ടി ജലീൽ നൽകിയ പരാതിയിൽ രജിസ്റ്റർ ചെയ്ത ഗൂഢാലോചനക്കേസിൽ സ്വർണക്കടത്ത് കേസ് പ്രതി സ്വപ്ന സുരേഷിനെ ഏഴുമണിക്കൂറോളം ക്രൈംബ്രാഞ്ച് ചോദ്യം ചെയ്തു. രാവിലെ 11മണിയോടെയാണ് സ്വപ്ന എറണാകുളം പൊലിസ് ക്ലബ്ബിൽ ചോദ്യം ചെയ്യലിനെത്തിയത്.സർക്കാരിനെതിരേ ഗൂഢാലോചന നടത്തിയിട്ടില്ലെന്ന് സ്വപ്ന മൊഴി നൽകി. അന്വേഷണത്തോട് സഹകരിക്കണമെന്നും വീണ്ടും വിളിപ്പിച്ചാൽ ഹാജരാകണമെന്നും അന്വേഷണ സംഘം ആവശ്യപ്പെട്ടിട്ടുണ്ട്.

അറസ്റ്റ് ഭയക്കുന്നില്ലെന്നും തന്നെ കുടുക്കാനാണ് ശ്രമിക്കുന്നതെന്നും സ്വപ്ന മാധ്യമങ്ങളോട് പറഞ്ഞു. ഇത് ആദ്യമായണ് ഈ കേസിൽ സ്വപ്നയെ ക്രൈംബ്രാഞ്ച് ചോദ്യം ചെയ്തത്. ഷാജ് കിരണിനെയും സ്വപ്നയെയും ഒരുമിച്ചിരുത്തി ചോദ്യം ചെയ്യാനും ക്രൈംബ്രാഞ്ച് ആലോചിക്കുന്നുണ്ട്.

അറസ്റ്റ് തൽ‍ക്കാലം ഉണ്ടാകില്ലെന്ന് സര്‍ക്കാര്‍
കൊച്ചി
മുഖ്യമന്ത്രിയടക്കമുള്ളവര്‍ക്കെതിരേ നടത്തിയ വെളിപ്പെടുത്തലുമായി ബന്ധപ്പെട്ട ഗൂഢാലോചന കേസില്‍ സ്വപ്ന സുരേഷിന്റെ അറസ്റ്റ് തല്‍ക്കാലം ഉണ്ടാകില്ലെന്ന് സര്‍ക്കാര്‍ ഹൈകോടതിയില്‍. സ്വപ്നക്ക് ചോദ്യം ചെയ്യലിന് വേണ്ടി നോട്ടിസ് നല്‍കിയിരിക്കുകയാണെന്നും ഈ സാഹചര്യത്തില്‍ അറസ്റ്റ് ചെയ്യുമെന്ന് ഭയക്കേണ്ടതില്ലെന്ന് സര്‍ക്കാറിന് വേണ്ടി ഡയരക്ടര്‍ ജനറല്‍ ഓഫ് പ്രോസിക്യുഷന്‍ കോടതിയെ അറിയിച്ചു. കേസില്‍ അറസ്റ്റ് തടയണമെന്നാവശ്യപ്പെട്ട് സ്വപ്ന നല്‍കിയ ഹരജിയാണ് കോടതി പരിഗണിച്ചത്. ഹരജി വീണ്ടും അടുത്തയാഴ്ച പരിഗണിക്കാനായി ജസ്റ്റിസ് വിജു എബ്രഹാം മാറ്റി.