തലശ്ശേരി: മുഴപ്പിലങ്ങാട് കൂടക്കടവ് ഗേറ്റിനു സമീപം വീട്ടുമുറ്റത്ത് നിര്‍ത്തിയിട്ട സി.പി.എം പ്രവര്‍ത്തകന്റെ ഓട്ടോക്ക് നേരെ അക്രമം. കൂടക്കടവിലെ ഷിജിന്റെ ഓട്ടോയാണ് അക്രമിച്ചത്. ഓട്ടോയുടെ പിന്‍ഭാഗത്തെ റക്‌സിനും സീറ്റും കുത്തിക്കീറി നശിപ്പിച്ചു. കഴിഞ്ഞദിവസം ഓട്ടോയുടെ മുകളില്‍ റീത്ത് വച്ചിരുന്നു. രണ്ട് ദിവസത്തിനകം നീ കൊല്ലപ്പെടുമെന്നു സന്ദേശമുള്ള ഊമക്കത്തും ഓട്ടോയുടെ മേല്‍ പതിച്ചിരുന്നു. ഇതുകാരണം ബന്ധുവായ ഭാസ്‌ക്കരന്റെ വീട്ടുമുറ്റത്താണ് ഓട്ടോ നിര്‍ത്തിയിട്ടിരുന്നത്. എടക്കാട് പൊലിസ് കേസെടുത്തു. സമാധാനം നിലനില്‍ക്കുന്ന പ്രദേശത്ത് ബോധപൂര്‍വം കുഴപ്പം സൃഷ്ടിക്കാനുള്ള ചിലരുടെ ശ്രമമാണ് സംഭവത്തിനു പിന്നിലെന്ന് സി.പി.എം മുഴപ്പിലങ്ങാട് ലോക്കല്‍ കമ്മിറ്റി പ്രസ്താവനയില്‍ പറഞ്ഞു.