ആലപ്പുഴ: ഭരണഘടനയെ അവഹേളിച്ചതിനെ തുടര്‍ന്ന് മന്ത്രിസ്ഥാനം രാജിവച്ച സജി ചെറിയാന് ഇന്ന് ചെങ്ങന്നൂരില്‍ ഒരുക്കിയ സ്വീകരണം വിവാദമായതോടെ റദ്ദാക്കി സി.പി.എം. അതേ സമയം കാലാവസ്ഥ അനുകൂലമല്ലാത്തതിനാലാണ് സ്വീകരണ പരിപാടി റദ്ദാക്കിയതെന്നാണ് സി.പി.എം പ്രദേശിക നേതൃത്വത്തിന്റെ വിശദീകരണം.
എന്നാല്‍ പരിപാടി വാര്‍ത്തയായതോടെയാണ് ഉപേക്ഷിച്ചത്. തിരുവനന്തപുരത്ത് നിന്ന് ചെങ്ങന്നൂരിലെത്തുന്ന സജി ചെറിയാന് ബഥേല്‍ ജംഗ്ഷനില്‍ സ്വീകരണം നല്‍കാനായിരുന്നു തീരുമാനം.
കാഞ്ഞിരത്തുംമൂട്ടില്‍ നിന്ന് പ്രവര്‍ത്തകരുടെ അകമ്പടിയോടെ സജി ചെറിയാനെ ആനയിച്ചു കൊണ്ടുവരാനായിരുന്നു പരിപാടി. എന്നാല്‍ സ്വീകരണം വാര്‍ത്തയായതോടെ പരിപാടി റദ്ദാക്കുകയായിരുന്നു.
സംഭവത്തില്‍ സജി ചെറിയാനെതിരെ കേസെടുത്തിട്ടുണ്ട്. കീഴ്വായ്പ്പൂര്‍ പൊലീസാണ് കേസ് രജിസ്റ്റര്‍ ചെയ്തത്. ഭരണഘടനയെ അവഹേളിച്ചെന്ന വകുപ്പ് പ്രകാരമാണ് കേസെടുത്തിരിക്കുന്നത്.