ബുണ്ടസ്‌ലിഗ; തുടര്‍ച്ചയായി പതിനൊന്നാമതും ചാംപ്യന്‍മാരായി ബയേണ്‍

മ്യൂണിക്: അവസാന മത്സരംവരെ ആവേശം നിറഞ്ഞ ബുണ്ടസ്‌ലിഗയില്‍ തുടര്‍ച്ചയായ 11ാം തവണയും ബയേണ്‍ മ്യൂണിക് ചാംപ്യന്‍മാര്‍. ലീഗിലെ അവസാന മത്സരത്തിലായിരുന്നു ബയേണ്‍ ലീഗ് കിരീടം ഉറപ്പിച്ചത്. അവസാന മത്സരത്തില്‍ ജയിച്ചിരുന്നെങ്കില്‍ ഡോര്‍ട്മുണ്ടിനായിരുന്നു കിരീടം ലഭിക്കേണ്ടിയിരുന്നത്. എന്നാല്‍ ഡോര്‍ട്മുണ്ട് മെയിന്‍സ് മത്സരം 22 എന്ന സ്‌കോറിന് സമനിലയില്‍ അവസാനിക്കുകയും കോണിനെതിരേ ബയേണ്‍ മ്യൂണിക് ജയിക്കുകയും ചെയ്തതോടെയാണ് ബയേണ്‍ കിരീടം സ്വന്തമാക്കിയത്.

34 മത്സരത്തില്‍ 71 പോയിന്റാണ് ഒന്നാം സ്ഥാനത്തുള്ള ബയേണിന്റെ സമ്പാദ്യം. ഇത്രയും മത്സരത്തില്‍ നിന്ന് 71 പോയിന്റ് തന്നെയാണ് ഡോര്‍ട്മുണ്ടിനുമുള്ളതെങ്കിലും ഗോള്‍ വിത്യാസത്തില്‍ ബയേണായിരുന്നു മുന്നില്‍. എട്ടാം മിനുട്ടില്‍ കിങ്സ്ലി കൊമാന്‍ ബയേണിനായി ഗോള്‍ നേടി. 81ാം മിനുട്ടില്‍ കോണ്‍ ഡ്യാന്‍ ലൂബിച്ചിലൂടെ സമനില പിടിച്ചു. 89ാം മിനുട്ടില്‍ ജമാല്‍ മുസിയേലയായിരുന്നു ബയേണിന്റെ വിജയ ഗോള്‍ സ്വന്തമാക്കി കിരീടം ഉറപ്പിച്ചത്.