കണ്ണൂര്‍: അര്‍ജുന്‍ ആയങ്കി ഉപയോഗിച്ച കെ.എല്‍ 13 എ.ആര്‍ 7789 നമ്പര്‍ മാരുതി സ്വിഫ്റ്റ് കാര്‍ ഡി.വൈ.എഫ്.ഐ ചെമ്പിലോട് നോര്‍ത്ത് മേഖലാ സെക്രട്ടറിയും സി.പി.എം മൊയ്യാരം ബ്രാഞ്ച് അംഗവുമായ സി. സജേഷിന്റേതാണെന്ന് കണ്ടെത്തി .
കാര്‍ രജിസ്റ്റര്‍ ചെയ്യാന്‍ നല്‍കിയ മൊബൈല്‍ നമ്പര്‍ ആയങ്കിയുടേതാണെന്നും കണ്ടെത്തി. ഇയാളുടെ സമൂഹമാധ്യമ അക്കൗണ്ടില്‍ മാസങ്ങള്‍ക്കു മുന്‍പ് കാറിന്റെ ചിത്രങ്ങളുണ്ടായിരുന്നു. അര്‍ജുന്‍ ആണ് കാര്‍ കാലങ്ങളായി ഉപയോഗിച്ചിരുന്നതെന്നു അഴീക്കലില്‍ കാര്‍ കണ്ടെത്തിയപ്പോള്‍ നാട്ടുകാര്‍ സ്ഥിരീകരിച്ചിരുന്നു. ഫേസ്ബുക്കില്‍ 44,000 പേര്‍ പിന്തുടരുന്ന സി.പി.എം സൈബര്‍ പോരാളിയാണിയാള്‍.അതേസമയം കോഴിക്കോട് മെഡിക്കല്‍കോളജില്‍ പോകാനാണ് അര്‍ജുന്‍ കാര്‍ കൊണ്ടുപോയതെന്നും ഇപ്പോള്‍ കാണാനില്ലെന്നും സജേഷ് കണ്ണൂര്‍ സിറ്റി അസി. പൊലിസ് കമ്മിഷണര്‍ക്കു പരാതി നല്‍കി. അന്വേഷണം തന്നിലേക്കു വരുന്നെന്നു മനസിലാക്കിയാണ് സജേഷിന്റെ നീക്കമെന്ന് പൊലിസ് പറയുന്നു.